പുഷ്പ 2 പ്രീമിയറിനിടെയുണ്ടായ അപകടത്തില് യുവതി മരിച്ച സംഭവത്തില് നടന് അല്ലു അര്ജുനെതിരെ കേസ്. അല്ലു അര്ജുനെ കൂടാതെ അപകടം നടന്ന സന്ധ്യ തിയറ്റര് മാനേജ്മെന്റിനെതിരെയും താരത്തിന്റെ സെക്യൂരിറ്റി ടീമിനെതിരെയും കേസെടുക്കുമെന്ന് പൊലീസ് പറഞ്ഞു.
അല്ലു അര്ജുന്റെ സെക്യൂരിറ്റി ടീം വരുത്തിയ വീഴ്ചയാണ് ഇത്രയും വലിയ ദുരന്തത്തിന് വഴിവെച്ചത് എന്ന് ഹൈദരാബാദ് സെന്ട്രല് സോണ് ഡിസിപി പറയുന്നത്. അല്ലു അര്ജുന് സിനിമയുടെ പ്രീമിയറിന് എത്തുമെന്ന് തിയറ്റര് മാനേജ്മെന്റിന് അറിയാമായിരുന്നെങ്കിലും ഈ വിവരം പൊലീസിനെ അറിയിക്കുന്നത് അവസാന നിമിഷമായിരുന്നു.
രാത്രി 9.30 ഓടെയാണ് താരവും കുടുംബവും തിയറ്ററില് എത്തിയത്. തുറന്ന ജീപ്പില് താരത്തെ കണ്ടതോടെ ആളുകള് തിക്കിത്തിരക്ക് കൂട്ടാന് തുടങ്ങി. ആളുകളെ താരത്തിന്റെ സെക്യൂരിറ്റി ടീം മര്ദിക്കുകയും ഇത് തിക്കിനും തിരക്കിനും കാരണമാവുകയും ചെയ്ത കാഴ്ചയാണ് കണ്ടത്. തുടർന്നാണ് പൊലീസിന് ലാത്തിച്ചാർജ് പ്രയോഗിക്കേണ്ടി വരികയായിരുന്നു.
ഹൈദരാബാദ് സ്വദേശിയായ രേവതി (39) എന്ന സ്ത്രീയാണ് ഇന്ന് രാത്രിയില് തിക്കിലും തിരക്കിലുംപ്പെട്ട് മരിച്ചത്. ഇവരുടെ 9 വയസുകാരനായ മകന് ഗുരുതരാവസ്ഥയില് ചികിത്സയിലാണ്. ഷോ കാണാൻ നായകനായ അല്ലു അർജുൻ എത്തുമെന്നു വിവരം ലഭിച്ചതോടെ തിയേറ്റർ പരിസരത്തേക്ക് ജനക്കൂട്ടം ഒഴുകിയെത്തുകയായിരുന്നു. ഒരു കുട്ടിയടക്കം രണ്ട് പേർ ബോധംകെട്ടു വീണിരുന്നു. ഇവരെ ഉടൻ ആശുപത്രിയിലേക്ക് മാറ്റി.