റോസ് ബ്രാൻഡ് ബിരിയാണി റൈസിന്റെ ബ്രാൻഡ് അംബാസഡറായ നടൻ ദുൽഖർ സൽമാൻ ഡിസംബർ 3ന് പത്തനംതിട്ട ഉപഭോക്തൃ തർക്ക പരിഹാര കമ്മീഷനിൽ നേരിട്ട് ഹാജരാകണമെന്ന് നോട്ടീസ്. പത്തനംതിട്ട വള്ളിക്കോട് സ്വദേശി പി എൻ ജയരാജൻ ഫയൽ ചെയ്ത ഹർജിയിലാണ് നടപടി.
ഒരു വിവാഹ ആവശ്യത്തിനായി വാങ്ങിയ 50 കിലോ റോസ് ബ്രാൻഡ് ബിരിയാണി റൈസ് ചാക്കിൽ പാക്കിംഗ് തീയതിയും എക്സ്പയറി തീയതിയും രേഖപ്പെടുത്തിയിരുന്നില്ലെന്നാണ് പരാതിയിൽ പറയുന്നത്. ഈ അരി ഉപയോഗിച്ച് ഉണ്ടാക്കിയ ബിരിയാണി റൈസും ചിക്കൻ കറിയും കഴിച്ചവർക്ക് ഭക്ഷ്യവിഷബാധ ഉണ്ടായതായും ഹർജിക്കാരൻ ആരോപിക്കുന്നു. ദുൽഖർ സൽമാനെ കൂടാതെ റോസ് ബ്രാൻഡ് ബിരിയാണി റൈസ് മാനേജിങ് ഡയറക്ടറും മലബാർ ബിരിയാണി ആൻഡ് സ്പൈസസ് പത്തനംതിട്ട മാനേജരും കമ്മീഷനിൽ ഹാജരാകണമെന്ന് നിർദ്ദേശിച്ചിട്ടുണ്ട്.
റോസ് ബ്രാൻഡ് ബിരിയാണി അരിയുമായി ബന്ധപ്പെട്ട കേസില് നേരിട്ട് ഹാജരാകണം; ബ്രാൻഡ് അംബാസഡറായ നടൻ ദുൽഖർ സൽമാന് ഉപഭോക്തൃ കമ്മീഷൻ നോട്ടീസ്
