സംസ്ഥാന സ്കൂൾ കലോത്സവം 2024 ജനുവരി നാല് മുതൽ എട്ട് വരെ കൊല്ലം ജില്ലയിൽ 24 വേദികളിലായി നടത്തുമെന്ന് പൊതുവിദ്യാഭ്യാസ മന്ത്രി വി ശിവൻകുട്ടി. 14 വർഷത്തിന് ശേഷമാണ് സംസ്ഥാന കലോത്സവത്തിന് കൊല്ലം വേദിയാകുന്നത്. ഇതിനൊപ്പം ദിശ എക്‌സിബിഷൻ, സാംസ്‌കാരിക പരിപാടികൾ എന്നിവയും നടത്തും. കൊല്ലം ആശ്രാമം മൈതാനമാണ് പ്രധാന വേദി.
പന്ത്രണ്ടായിരത്തോളം മത്സരാർത്ഥികൾ പങ്കെടുക്കും. എ ഗ്രേഡ് നേടുന്ന മത്സരാർത്ഥികൾക്ക് ആയിരം രൂപ തോതിൽ സാംസ്‌ക്കാരിക സ്‌കോളർഷിപ്പ് നൽകും. കൂടുതൽ പോയിന്റ് നേടുന്ന ജില്ലക്ക് പ്രശസ്ത ശില്പി ചിറയിൻകീഴ് ശ്രീകണ്ഠൻ നായർ രൂപകല്പന ചെയ്ത 117.5 പവൻ സ്വർണ്ണകപ്പ് നൽകും. കലോത്സവത്തിന്റെ സുഗമമായ നടത്തിപ്പിന് 21 സബ് കമ്മിറ്റി പ്രവർത്തിക്കുന്നു. 26 ന് കൊല്ലം ജില്ല പഞ്ചായത്ത് ഹാളിൽ വിപുലമായ സ്വാഗത സംഘ രൂപവത്കരിക്കും. ഗ്രീൻ പ്രോട്ടോകോൾ പാലിച്ചായിരിക്കും മേളകൾ.
ഗവ.എയ്ഡഡ്, ഗവ.അംഗീകൃത അൺ എയ്ഡഡ് സ്‌പെഷ്യൽ സ്‌കൂളുകളിലെ വിദ്യാർത്ഥികളുടെയും ഭിന്നശേഷിയുള്ള ജനറൽ സ്‌കൂളുകളിലെ വിദ്യാർത്ഥികളുടേയും 24-ാമത് സംസ്ഥാന സ്‌പെഷ്യൽ സ്കൂൾ കലോത്സവം 2023 നവംബർ ഒമ്പത് മുതൽ 11 വരെ എറണാകുളം കളമശ്ശേരി ഗവ. വിഎച്ച്എസ്എസിൽ നടക്കും. 1600 ഓളം വിദ്യാർത്ഥികൾ മാറ്റുരയ്ക്കുമെന്നും മന്ത്രി പറഞ്ഞു.
English Summary: school kalolsavam in Kollam from 4th to 8th
You may also like this video
