സംസ്ഥാന സ്കൂള്‍ ശാസ്ത്രോത്സവത്തിന് നാളെ തിരുവനന്തപുരത്ത് തുടക്കമാകും. ഗവ. ഗേള്‍സ് എച്ച്എസ്എസ് കോട്ടണ്‍ഹില്ലാണ് പ്രധാനവേദി. നാളെ രാവിലെ 10:30ന് ഗവ. ഗേള്‍സ് എച്ച്എസ്എസ് കോട്ടണ്‍ഹില്ലില്‍ പൊതുവിദ്യാഭ്യാസ ഡയറക്ടര്‍ പതാക ഉയര്‍ത്തും. നിയമസഭാ സ്‍പീക്കര്‍ എ എന്‍ ഷംസീര്‍ ഉദ്ഘാടനം ചെയ്യും. മേയര്‍ ആര്യാ രാജേന്ദ്രന്‍ അധ്യക്ഷയാകും. ജില്ലയിലെ എംപിമാര്‍, എംഎല്‍എമാര്‍, ജില്ലാ പഞ്ചായത്ത് പ്രസിഡന്റ്, ജില്ലാ കളക്ടര്‍ എന്നിവര്‍ വിശിഷ്ടാതിഥികളാകും. നാലിന് വൈകിട്ട് നാല് മണിക്ക് കോട്ടണ്‍ഹില്ലില്‍ നടക്കുന്ന സമാപന സമ്മേളനം വി കെ പ്രശാന്ത് എംഎല്‍എ ഉദ്ഘാടനം ചെയ്യും. ഡെപ്യുട്ടി മേയര്‍ പി കെ രാജു അധ്യക്ഷനാകും.
നാല് ദിവസങ്ങളിലായി നടക്കുന്ന ശാസ്ത്രോത്സവത്തില്‍ ആദ്യ ദിവസം രജിസ്ട്രേഷനും ഒന്ന് മുതല്‍ മൂന്നുവരെയുള്ള തീയതികളില്‍ മത്സരങ്ങളും പ്രദര്‍ശനവുമാണ് നടക്കുക. 7500 ഓളം വിദ്യാര്‍ത്ഥികള്‍ പങ്കെ‍ടുക്കും. ശാസ്ത്രവിഭാഗം — 18, ഗണിതശാസ്ത്രവിഭാഗം — 29, സാമൂഹ്യശാസ്ത്ര വിഭാഗം — 15, പ്രവൃത്തി പരിചയ വിഭാഗം — 102, ഐടി വിഭാഗം ‑16 എന്നിങ്ങനെ എച്ച്എസ്എസ്, വിഎച്ച്എസ്എസ് വിഭാഗങ്ങളിലായി ആകെ 180 ഇനങ്ങളിലാണ് മത്സരം നടക്കുക.
English Summary: School science festival from tomorrow
You may also like this video
