ഇന്ത്യക്കാരനായ ശുഭാംശു ശുക്ല ഉള്പ്പെടുന്ന ബഹിരാകാശ ദൗത്യമായ ആക്സിയം 4ന്റെ വിക്ഷേപണം ഇന്ന്. ഇന്നലെ നടക്കേണ്ടിയിരുന്ന ദൗത്യം മോശം കാലാവസ്ഥ കാരണം ഇന്ന് വൈകിട്ട് 5.30ലേക്ക് മാറ്റുകയായിരുന്നു. ഫ്ലോറിഡ കെന്നഡി സ്പേസ് സെന്ററില് നിന്നാണ് സ്പെയ്സ് എക്സ് ഫാല്ക്കണ് 9 റോക്കറ്റ് കുതിച്ചുയരുക. അന്താരാഷ്ട്ര ബഹിരാകാശ നിലയത്തിലേക്ക് യാത്ര ചെയ്യുന്ന ആദ്യ ഇന്ത്യക്കാരനാണ് ശുഭാംശു ശുക്ല. നാസയും ഐഎസ്ആര്ഒയുമായും സഹകരിച്ചാണ് ദൗത്യം. പെഗ്ഗി വിറ്റ്സണ്, ടിഗോര് കപു, സ്ലാവോസ് ഉസ്നാന്സ്കി-വിസ്നിവ്സ്കി എന്നിവരാണ് മറ്റ് യാത്രികര്. ശുഭാംശു ശുക്ല മിഷന് പൈലറ്റായാണ് പ്രവര്ത്തിക്കുക.
ഐഎസ്എസില് 14 ദിവസത്തോളം സംഘം തങ്ങും. വിവിധ ഗവേഷണങ്ങള്, വിദ്യാഭ്യാസ ദൗത്യം, വാണിജ്യ പ്രവര്ത്തനങ്ങള് എന്നിവയെല്ലാം ഈ ദൗത്യത്തില് ഉള്ക്കൊള്ളിച്ചിരിക്കുന്നു. 1984ല് യാത്ര നടത്തിയ രാകേഷ് ശര്മ്മയാണ് ആദ്യ ഇന്ത്യന് ബഹിരാകാശ യാത്രികന്. ഈ ദൗത്യത്തിന്റെ ഭാഗമായി അദ്ദേഹം ഏഴ് ദിവസവും 21 മണിക്കൂറും 40 മിനിറ്റും ബഹിരാകാശത്ത് ചെലവഴിച്ചു. ഇതിന് ശേഷം ഇന്ത്യന് വംശജരായ കല്പന ചൗള, സുനിത വില്യംസ് എന്നിവര് ബഹിരാകാശ യാത്ര നടത്തിയിട്ടുണ്ട്. എന്നാല് ഇവര് ഇന്ത്യന് പൗരത്വം ഉള്ളവരായിരുന്നില്ല.