എപിജെ അബ്ദുള് കലാം സാങ്കേതിക സര്വകലാശാല വിസിയായി ഡോ. സിസ തോമസിനെയും ഡിജിറ്റല് സര്വകലാശാല വിസിയായി ഡോ. സജി ഗോപിനാഥിനെയും നിയമിച്ച് ഗവര്ണര് രാജേന്ദ്ര വിശ്വനാഥ ആര്ലേക്കര് ഉത്തരവിട്ടു. നാലുവര്ഷത്തേക്കോ 65 വയസ് തികയുന്നത് വരെയുമാണ് നിയമനം. ഡോ. സജി ഗോപിനാഥ് ഡിജിറ്റല് സര്വകലാശാലയുടെ പ്രഥമ വിസിയായിരുന്നു. ഐഐഎസ്-സി ബെംഗ്ലൂരിൽ നിന്ന് പിഎച്ച്ഡി ബിരുദം നേടിയ സജി ഗോപിനാഥ് കോഴിക്കോട് ഐഐഎമ്മിലെ പ്രൊഫസറാണ്. കേരള അക്കാദമി ഓഫ് സ്കിൽസ് ഡയറക്ടര്, മുഖ്യമന്ത്രിയുടെ ഹൈപവർ ഐടി കമ്മിറ്റിയംഗം, കേരള സ്റ്റാർട്ടപ്പ് മിഷന്റെ ചീഫ് എക്സിക്യൂട്ടീവ് ഡയറക്ടര് എന്നീ നിലകളിലും പ്രവര്ത്തിച്ചിട്ടുണ്ട്.
ഡോ. സിസാ തോമസ് നിലവില് ഡിജിറ്റല് സര്വകലാശാലയുടെ താല്ക്കാലിക വിസിയാണ്. കെടിയുവിന്റെയും താല്ക്കാലിക ചുമതല വഹിച്ചിട്ടുണ്ട്. സാങ്കേതിക വിദ്യാഭ്യാസ വകുപ്പിൽ സീനിയർ ജോയിന്റ് ഡയറക്ടർ, ഗവൺമെന്റ് എൻജിനീയറിങ് കോളജ് പ്രിൻസിപ്പലായും സേവനമനുഷ്ഠിച്ചിട്ടുണ്ട്. ഇരുവരെയും നിയമിക്കുന്ന വിവരം ഗവര്ണര് സുപ്രീംകോടതിയെ അറിയിച്ചിരുന്നു.