മത്സരത്തിനിടയിലെ ഇടവേളകളിൽ അധ്യാപകർ നൽകിയ ഭക്ഷണം പോലും ത്യജിച്ച നിവേദിതയുടെ അർപ്പണബോധം ആരെയും അത്ഭുതപ്പെടുത്തുന്നതായിരുന്നു. കാഞ്ഞിരപ്പള്ളി അസീസി സ്കൂൾ ഓഫ് ബ്ലൈൻഡിലെ ഒന്നാം ക്ലാസ് വിദ്യാർത്ഥിനിയാണ് നിവേദിത. കുടനിർമ്മാണമായിരുന്നു നിവേദിതയുടെ മത്സര ഇനം. അതിവേഗം ആകര്‍ഷകമായ മൂന്നു കുടകൾ ഈ വിദ്യാർത്ഥിനി നിർമ്മിച്ചു. ഇത് മറ്റ് മത്സരാർത്ഥികൾക്ക് വലിയ വെല്ലുവിളി ഉയർത്തുകയും ചെയ്തു. 80 ശതമാനത്തോളം കാഴ്ചയ്ക്ക് വൈകല്യമുണ്ടെങ്കിലും നിവേദിതക്ക് മത്സരം ഒട്ടും വെല്ലുവിളി നിറഞ്ഞതായിരുന്നില്ല. കുടനിർമ്മാണത്തിൽ സ്വയം ആർജിച്ചെടുത്ത കഴിവുമായിരുന്നു തന്റെ കന്നി മത്സരത്തിന് നിവേദിത എത്തിയത്.
മൂന്ന് മണിക്കൂർ നീണ്ട് നിന്ന മത്സരത്തിന്റെ ഇടവേളകളില്‍ പോലും നിവേദിത സമയം കളഞ്ഞില്ല. സൂചികോർത്ത് ശീലകളിൽ കമ്പി സൂക്ഷ്മതയോടെ പിടിപ്പിച്ച് അതിവേഗം മത്സരം പൂർത്തിയാക്കി. സ്കുൾ അധ്യാപകർക്കൊപ്പമാണ് നിവേദിത മത്സരവേദിയായ തേവര സ്കുളിലെത്തിയത്. കൊച്ചിയിലെത്തി തന്റെ ആദ്യാഭിലാഷം പൂർത്തീകരിച്ച ശേഷമാണ് നിവേദിത മത്സരവേദിയിൽ കാലുവച്ചത്. വിമാനം കാണുകയെന്നതായിരുന്നു അത്. അധ്യാപകർക്കൊപ്പമായിരുന്നു ആ ആഗ്രഹം സഫലമാക്കിയത്. കാളകെട്ടി സ്വദേശികളായ സതീഷിന്റെയും ഷിജിയുടെയും മകളാണ് നിവേദിത. നിവേദിതയുടെ കഴിവുകൾ കേട്ടറിഞ്ഞ മന്ത്രി വി ശിവൻകുട്ടി, ഈ മിടുക്കിയെ അഭിനന്ദിച്ചു. കലാരംഗത്തും നിവേദിത കഴിവ് തെളിയിച്ചിട്ടുണ്ട്.
English Summary:State School Science Fair; umbrella making by Nivedita
You may also like this video
