മദ്രാസ് ഐഐടിയില്‍ വിദ്യാര്‍ത്ഥി ജീവനൊടുക്കി. രണ്ടാംവര്‍ഷ വിദ്യാര്‍ത്ഥിയായ നവിമുംബൈ സ്വദേശി സ്റ്റീഫന്‍ സണ്ണി(25)യെയാണ് തിങ്കളാഴ്ച വൈകിട്ട് ഹോസ്റ്റല്‍ മുറിയില്‍ തൂങ്ങിമരിച്ച നിലയില്‍ കണ്ടത്.
അതേസമയം, ഇതിനുപിന്നാലെ മറ്റൊരു വിദ്യാര്‍ത്ഥിയും കാമ്പസില്‍ ആത്മഹത്യക്ക് ശ്രമിച്ചു. കര്‍ണാടക സ്വദേശിയായ വിദ്യാര്‍ത്ഥിയാണ് ആത്മഹത്യാശ്രമം നടത്തിയത്. രണ്ടുസംഭവങ്ങളുടെയും പശ്ചാത്തലത്തില്‍ ഐഐടി അഡ്മിനിസ്ട്രേഷനെതിരേ വിദ്യാര്‍ത്ഥികള്‍ പ്രതിഷേധവുമായി രംഗത്തെത്തി.
കാമ്പസിലെ മഹാനദി ഹോസ്റ്റലിലാണ് സ്റ്റീഫന്‍ സണ്ണിയെ സീലിങ് ഫാനില്‍ തൂങ്ങിമരിച്ചനിലയില്‍ കണ്ടത്. ഒരാഴ്ചയായി വിദ്യാര്‍ത്ഥി വിഷാദത്തിലായിരുന്നുവെന്നാണ് പൊലീസ് നല്‍കുന്ന പ്രാഥമികവിവരം.
ഒരു ആത്മഹത്യാക്കുറിപ്പ് സ്റ്റീഫന്റെ ലാപ്‌ടോപ്പില്‍നിന്ന് കണ്ടെടുത്തതായി വിവരമുണ്ട്. സംഭവത്തില്‍ കോട്ടൂര്‍പുരം പൊലീസ് കേസെടുത്ത് അന്വേഷണം ആരംഭിച്ചു. കഴിഞ്ഞദിവസം ബോംബെ ഐഐടിയില്‍ ജാതി അധിക്ഷേപത്തെത്തുടര്‍ന്ന് വിദ്യാര്‍ത്ഥി ജീവനൊടുക്കിയിരുന്നു.
English Summary: Student commits suicide at IIT Madras
You may also like this video
