പാകിസ്താനിലെ ബലൂചിസ്ഥാനിൽ രാഷ്ട്രീയ റാലിക്ക് നേരെ നടന്ന ചാവേർ ആക്രമണത്തിൽ 14 പേർ കൊല്ലപ്പെട്ടു. ആക്രമണത്തിൽ 20ൽ അധികം പേർക്ക് പരിക്കേറ്റു. ബലൂചിസ്ഥാൻ നാഷണൽ പാർട്ടി (ബി എൻ പി) സംഘടിപ്പിച്ച റാലിക്കിടെയാണ് സ്ഫോടനമുണ്ടായതെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
മുൻ പ്രവിശ്യാ മുഖ്യമന്ത്രിയായിരുന്ന സർദാർ അതൗല്ല മെംഗലിന്റെ ചരമവാർഷികത്തോടനുബന്ധിച്ച് ക്വറ്റയിലെ ഒരു സ്റ്റേഡിയത്തിൽ നടന്ന റാലിയുടെ പാർക്കിങ് ഏരിയയിലാണ് സ്ഫോടനമുണ്ടായത്. പരിക്കേറ്റവരെ ഉടൻ തന്നെ പ്രാദേശിക ആശുപത്രികളിൽ പ്രവേശിപ്പിച്ചു. ആക്രമണത്തെ ബലൂചിസ്ഥാൻ മുഖ്യമന്ത്രി സർഫ്രാസ് ബുഗ്തി ശക്തമായി അപലപിച്ചു. “ശത്രുക്കളുടെ ഭീരുത്വം നിറഞ്ഞ പ്രവൃത്തി” എന്ന് ഇതിനെ വിശേഷിപ്പിച്ച അദ്ദേഹം, ഭീകരരുടെ ലക്ഷ്യങ്ങൾ പരാജയപ്പെടുത്തുമെന്ന് വ്യക്തമാക്കി. സംഭവത്തിന്റെ ഉത്തരവാദിത്തം ഇതുവരെ ഒരു സംഘടനയും ഏറ്റെടുത്തിട്ടില്ല.