ആഴിമലയിൽ നിന്ന് കാണാതായ യുവാവിന്റെ മൃതദേഹം ബന്ധുക്കൾ ഏറ്റുവാങ്ങി സംസ്കരിച്ചു. മൊട്ടമൂട് വള്ളോട്ടുകോണം ആർസി പളളിയ്ക്ക് സമീപം മധുവിന്റെയും മിനിയുടെയും മകനായ കിരണിന്റെ(25) മൃതദേഹമാണ് ഇന്നലെ ബന്ധുക്കൾക്ക് വിട്ടു നൽകിയത്. വിഴിഞ്ഞം സിഐ പ്രജീഷ് ശശിയുടെ നേതൃത്വത്തിലുളള പൊലീസ് സംഘം തമിഴ‌്നാട് കുളച്ചൽ നിദ്രവിള പൊലീസ് സ്‌റ്റേഷനിലെത്തി നടപടിക്രമങ്ങൾ പൂർത്തിയാക്കിയതോടെയാണ് നാഗർകോവിലിലെ ആശാരിപളളം മെഡിക്കൽ കോളജ് ആശുപത്രി മോർച്ചറിയിൽ സൂക്ഷിച്ചിരുന്ന മൃതദേഹം ബന്ധുക്കൾക്ക് വിട്ടു കിട്ടിയത്. തുടർന്ന് സന്ധ്യയോടെ മൊട്ടമൂടിലുളള വീട്ടിലെത്തിച്ച് പൊതുദർശനത്തിനുശേഷം മാറനല്ലൂർ ശ്മശാനത്തിൽ സംസ്കരിച്ചു.
കഴിഞ്ഞ ഒൻപതിന് ആഴിമല കടലിൽ കാണാതായ കിരണിന്റെ മൃതദേഹം ദിവസങ്ങൾക്ക് ശേഷം കുളച്ചൽ തീരത്ത് കണ്ടെത്തിയെങ്കിലും മൃതദേഹം വിട്ടുകിട്ടാൻ ഡിഎൻഎ ടെസ്റ്റ് ഫലം വരെ കാത്തിരിക്കേണ്ടി വന്നു. ജീർണാവസ്ഥയിലായിരുന്ന മൃതദേഹം കിരണിന്റെതാണെന്ന് ഉറപ്പുവരുത്താൻ നടത്തിയ ഡിഎൻഎ ടെസ്റ്റ് ഫലം അനുകൂലമായതോടെയാണ് മൃതദേഹം വിട്ടുനൽകാൻ അധികൃതർ തയാറായത്.
കിരണിന്റെത് മുങ്ങിമരണമാണെന്നും ശരീരത്തിൽ മരണകാരണമായേക്കാവുന്ന മുറിവുകൾ ഇല്ലെന്നുമാണ് പോസ്റ്റ്മോർട്ടം നടത്തിയ ഡോക്ടർമാർ നൽകിയ പ്രാഥമിക വിവരം. സമൂഹമാധ്യമത്തിലൂടെ പരിചയപ്പെട്ട പെൺസുഹൃത്തിനെ കാണാനാണ് കിരൺ ആഴിമലയിലെത്തിയത്. സുഹൃത്തായ അനന്തുവിനും ബന്ധുവായ മെൽവിനും ഒപ്പം ആഴിമലയിലെത്തിയ കിരണിനെ യുവതിയുടെ സഹോദരൻ ഹരിയും സഹോദരി ഭർത്താവ് രാജേഷും സുഹൃത്തായ അരുണും ചേർന്ന് മർദ്ദിച്ചിരുന്നതായി വിഴിഞ്ഞം പൊലീസ് പറഞ്ഞു. ദുരൂഹത നീക്കാൻ അന്വേഷണം തുടരുകയാണ്.
English summary;The body of the missing youth was cremated
YOu may also like this video;
