ഓടിക്കൊണ്ടിരുന്ന കാറിന് തീപിടിച്ചു. ചിതറ മുള്ളിക്കാട് കാനൂർ പള്ളി കിഴക്കതിൽ വീട്ടിൽ സജീറിന്റെ കാറിനാണ് തീപിടിച്ചത്. തിങ്കളാഴ്ച രാത്രി 7.45 ന് ചിതറ അയിരക്കുഴിയിലാണ് സംഭവം.
സജീറും പിതാവ് ഷിഹാബുദീനും കൂടി കാനൂരിൽ നിന്നും നിലമേലിലേക്ക് പോവുകയായിരുന്നു. കാറിന്റെ മുൻഭാഗത്ത് നിന്നും പുക ഉയരുന്നത് കണ്ട് വണ്ടി നിർത്തി ഇരുവരും പുറത്തിറങ്ങിയ ഉടൻ തീ പിടിക്കുകയായിരുന്നു. സജീർ കടയ്ക്കൽ അഗ്നിരക്ഷാനിലയത്തിൽ വിവരമറിയിച്ചു. അഗ്നിരക്ഷാസേനയെത്തിയപ്പോഴേയ്ക്കും മുൻഭാഗം പൂർണമായും കത്തിനശിച്ചിരുന്നു.