ഡിഎംകെ-കോൺഗ്രസ് സീറ്റ് വിഭജനത്തെച്ചൊല്ലി സംഘർഷം രൂക്ഷമാകുന്നു

2026 ലെ തമിഴ്‌നാട് നിയമസഭാ തെരഞ്ഞെടുപ്പിന് മുന്നോടിയായി, ദ്രാവിഡ മുന്നേറ്റ കഴകവും (ഡിഎംകെ) കോൺഗ്രസും തമ്മിലുള്ള ദീർഘകാല സഖ്യം ഇതുവരെയുള്ളതിൽ വച്ച് ഏറ്റവും കടുത്ത പരീക്ഷണത്തെ നേരിടുകയാണ്, സീറ്റ് വിഭജന ചർച്ചകൾ നിർണായക ഘട്ടത്തിലെത്തിയപ്പോള്‍ ഇരുപക്ഷവും തങ്ങളുടെ നിലപാടുകളില്‍ ഉറച്ചുനില്‍ക്കുകയാണ്. കോൺഗ്രസ് നേതാക്കളുടെ കാലതാമസത്തിലും പരസ്യമായ പെരുമാറ്റത്തിലും വർധിച്ചുവരുന്ന നിരാശകൾക്കിടയിലും, നിയമസഭാ സീറ്റുകളും ഒരു രാജ്യസഭാ നാമനിർദേശവും ഉൾപ്പെടുന്ന സംയുക്ത കരാർ അംഗീകരിക്കുന്നതിന് ഡിഎംകെ കോൺഗ്രസിന് നല്‍കിയ സമയപരിധി അവസാനിക്കുമ്പോഴും ഇരുകക്ഷികളും അന്തിമധാരണയിലെത്തിയില്ല. നാളെ രാജ്യസഭയിലേക്ക് നാമനിർദേശ പത്രിക സമർപ്പിക്കാനുള്ള അവസാന തീയതിക്ക് മുമ്പ് നാമനിർദേശ പത്രികകളും സത്യവാങ്മൂലങ്ങളും തയ്യാറാക്കാൻ സമയം ആവശ്യമാണെന്ന് ചൂതമിഴ്നാട്ടിൽ വരാനിരിക്കുന്ന നിയമസഭാ തിരഞ്ഞെടുപ്പിനെ സംയുക്തമായി നേരിടുന്നതിനുള്ള സാധ്യതകൾ തെളിഞ്ഞുണ്ടിക്കാട്ടി ഭരണകക്ഷിയായ ഡിഎംകെ ചർച്ചകൾ കൂടുതൽ നീട്ടാൻ ആഗ്രഹിക്കുന്നില്ലെന്ന് വ്യക്തമാക്കിയിരുന്നു.
1960 മുതൽ തമിഴ്‌നാട് രാഷ്ട്രീയത്തിന്റെ ഒരു മൂലക്കല്ലായി ഡിഎംകെ-കോൺഗ്രസ് പങ്കാളിത്തം നിലകൊള്ളുന്നു. ഫെഡറലിസം, മതേതരത്വം, സാമൂഹിക നീതി എന്നീ പൊതുവായ പ്രത്യയശാസ്ത്രങ്ങളിൽ വേരൂന്നിയതാണ് ഈ സഖ്യം. 2021‑ലെ നിയമസഭാ തെരഞ്ഞെടുപ്പിൽ ഉൾപ്പെടെ, സമീപകാല തെരഞ്ഞെടുപ്പുകളിൽ വരെ ഡിഎംകെ നയിക്കുന്ന സെക്കുലർ പ്രോഗ്രസീവ് അലയൻസിനെ (എസ് പിഎ) വിജയത്തിലേക്ക് നയിച്ചത് ഈ സഖ്യമാണ്. മുന്‍ തെരഞ്ഞെടുപ്പിൽ കോൺഗ്രസ് 25 സീറ്റിൽ മത്സരിക്കുകയും 18 സീറ്റുകൾ നേടുകയും ചെയ്തു. ഇത് സഖ്യത്തിന്റെ ആധിപത്യത്തിന് കാരണമായി. എന്നാല്‍, മെയ് 10ന് മുമ്പ് പ്രതീക്ഷിക്കുന്ന 2026 ലെ തെരഞ്ഞെടുപ്പ് പുതിയ വെല്ലുവിളികൾ ഉയർത്തുന്നു.
ഡിഎംകെ സർക്കാരിനെതിരെയും നടൻ വിജയ് നയിക്കുന്ന തമിഴക വെട്രി കഴകം (ടിവികെ) പോലുള്ള വളർന്നുവരുന്ന പാർട്ടികൾക്കെതിരെയും ഭരണവിരുദ്ധ വികാരം യുവാക്കൾക്കിടയിൽ പ്രചാരം നേടിക്കൊണ്ടിരിക്കുന്നതിനിടെയാണ്, ഇരു പാർട്ടികളും കൂടുതൽ ശക്തമായി സീറ്റുകള്‍ക്കായി മത്സരിക്കുന്നത്.
കൂടുതൽ സീറ്റുകൾ വേണമെന്ന കോൺഗ്രസിന്റെ ആവശ്യത്തിൽ നിന്നാണ് ഇപ്പോഴത്തെ പ്രതിസന്ധി ഉടലെടുത്തത്. 2021 ൽ കോൺഗ്രസ് 25 നിയമസഭാ സീറ്റുകൾ കൊണ്ട് തൃപ്തിപ്പെട്ടു, എന്നാൽ ഇത്തവണ 33 മുതൽ 45 വരെ മണ്ഡലങ്ങൾ വേണമെന്നു കാട്ടി ഒരു ലിസ്റ്റ് സമർപ്പിച്ചിട്ടുണ്ട്, കൂടുതൽ വിഹിതം പ്രധാന മേഖലകളിൽ സഖ്യത്തിന്റെ വിജയസാധ്യത വർധിപ്പിക്കുമെന്ന് കോണ്‍ഗ്രസ് വാദിക്കുന്നു.
ചെന്നൈയിലെ ചർച്ചകൾക്ക് ശേഷം ഡൽഹിയിലേക്ക് മടങ്ങിയ തമിഴ്‌നാടിന്റെ എഐസിസി ചുമതലയുള്ള ഗിരീഷ് ചോഡങ്കർ, ഭാവിയിൽ സ്വതന്ത്രമായി രാജ്യസഭാ പ്രാതിനിധ്യം ഉറപ്പാക്കുന്നതിന് നിയമസഭാ അംഗബലത്തിന് പാർട്ടി മുൻഗണന നല്‍കണമെന്ന് ഊന്നിപ്പറഞ്ഞു. “അവർ ഞങ്ങൾക്ക് 25 സീറ്റുകൾ വാഗ്ദാനം ചെയ്തു, പക്ഷേ അത് ഞങ്ങൾക്ക് സ്വീകാര്യമല്ല,” ചോഡങ്കര്‍ പറഞ്ഞു. ഡിഎംകെയിൽ നിന്ന് കൂടുതൽ ചർച്ചകൾക്കുള്ള ആഹ്വാനങ്ങളൊന്നും വന്നിട്ടില്ലെന്നും ടിവികെയുമായുള്ള ചർച്ചകളില്‍ തീരുമാനമായിട്ടില്ലെന്നും അദ്ദേഹം കൂട്ടിച്ചേര്‍ത്തു. എന്നാല്‍, ഡിഎംകെ വൃത്തങ്ങൾ കോണ്‍ഗ്രസ് ആവശ്യത്തെ അനാവശ്യ സമ്മർദമായി കാണുന്നു, ഡിഎംകെ 25–28 നിയമസഭാ സീറ്റുകളും ഒരു രാജ്യസഭാ സീറ്റും മാത്രമേ ഒരു സംയോജിത കരാറായി കോണ്‍ഗ്രസിന് വാഗ്ദാനം ചെയ്യുന്നുള്ളൂ.
ഡിഎംകെ-കോൺഗ്രസ് സഖ്യം തകര്‍ച്ചയുടെ വക്കിലെത്തിയ സമയത്ത്, ഡിഎംകെ പാർലമെന്ററി പാർട്ടി നേതാവ് കനിമൊഴി കരുണാനിധിയും കോൺഗ്രസ് എംപി കാർത്തി പി ചിദംബരവും തിരശ്ശീലയ്ക്ക് പിന്നിൽ വഹിച്ച പങ്ക് ഇരു പാർട്ടികളുടെയും നേതൃത്വത്തിനിടയില്‍ മഞ്ഞുരുക്കിയിട്ടുണ്ട്. മുന്നണി നിലനിർത്തുന്നതിനു വേണ്ടി കോൺഗ്രസ് പ്രസിഡന്റ് മല്ലികാർജുൻ ഖാർഗെയും കെ സി വേണുഗോപാലും ഇടപെട്ടു. ഡിഎംകെ പ്രസിഡന്റും മുഖ്യമന്ത്രിയുമായ എം കെ സ്റ്റാലിനുമായി കൂടിക്കാഴ്ച നടത്താൻ കോൺഗ്രസ് മുതിർന്ന നേതാവ് പി ചിദംബരത്തെ കോണ്‍ഗ്രസ് നിയോഗിച്ചിട്ടുണ്ട്.