സിപിഐ (എം) 24–-ാം പാർടി കോൺഗ്രസിനു മുന്നോടിയായി സംസ്ഥാനത്തെ ജില്ലാ സമ്മേളനത്തിന് തുടക്കമായി . കൊല്ലം ജില്ലാ സമ്മേളനത്തിന് ഇന്ന് തുടക്കമാകും. കൊട്ടിയം മയ്യനാട് ധവളക്കുഴി കോടിയേരി ബാലകൃഷ്ണൻ നഗറിൽ (എൻ എസ് പഠനഗവേഷണകേന്ദ്രം, മയ്യനാട്) 12വരെയാണ്‌ സമ്മേളനം.മൂന്നുദിവസത്തെ സമ്മേളനത്തിൽ 450 പ്രതിനിധികൾ പങ്കെടുക്കും. പൊളിറ്റ്‌ബ്യൂറോ അംഗം എം എ ബേബി രാവിലെ പ്രതിനിധി സമ്മേളനം ഉദ്ഘാടനം ചെയ്യും.
സംസ്ഥാന സെക്രട്ടറി എം വി ഗോവിന്ദൻ, കേന്ദ്രകമ്മിറ്റി അംഗങ്ങളായ എ കെ ബാലൻ, കെ കെ ശൈലജ, കെ എൻ ബാലഗോപാൽ, സി എസ് സുജാത, സംസ്ഥാന സെക്രട്ടറിയറ്റ് അംഗങ്ങളായ ടി പി രാമകൃഷ്ണൻ, കെ കെ ജയചന്ദ്രൻ, പുത്തലത്ത് ദിനേശൻ, എം സ്വരാജ് എന്നിവർ പങ്കെടുക്കും. സമ്മേളന നഗറിൽ പൊതുസമ്മേളനം 12നു വൈകിട്ട് 4.30ന് ചേരും. എം വി ഗോവിന്ദൻ, എം എ ബേബി, കെ എൻ ബാലഗോപാൽ, കെ കെ ശൈലജ, എം സ്വരാജ് തുടങ്ങിയവർ പങ്കെടുക്കും. ശൂരനാട്‌ രക്തസാക്ഷിമണ്ഡപത്തിൽനിന്നു പതാക, കടയ്‌ക്കൽ വിപ്ലവസ്‌മാരകത്തിൽനിന്നു കൊടിമരം, കോട്ടാത്തല സുരേന്ദ്രൻ രക്തസാക്ഷിമണ്ഡപത്തിൽ നിന്നു ദീപശിഖ ജാഥകൾ തിങ്കൾ വൈകിട്ട് സമ്മേളന നഗറിലെത്തി.പാര്‍ട്ടി സംസ്ഥാന സമ്മേളനം കൊല്ലത്തുവച്ചാണ് നടക്കുക