ഏഴാം ഗെയിമിലെന്ന പോലെ ലോക ചെസ് ചാമ്പ്യന്‍ഷിപ്പ് ഫൈനലിലെ എട്ടാം ഗെയിമിലും വിജയപ്രതീക്ഷ നല്‍കിയ ശേഷം സമനില വഴങ്ങി ഇന്ത്യയുടെ ഡി ഗുകേഷ്. ചൈനയുടെ ഡിങ് ലിറനെതിരെ ഒരു ഘട്ടത്തില്‍ മുന്‍തൂക്കം നേടിയ ശേഷമാണ് ഗുകേഷ് സമനിലയിലേക്കെത്തിയത്.
വാശിയേറിയ പോരാട്ടത്തില്‍ 51 നീക്കങ്ങള്‍ക്കൊടുവിലാണ് ഇരുവരും കൈകൊടുത്ത് പിരിഞ്ഞത്. ഇതോടെ പോയിന്റ് 4–4 എന്ന നിലയിലായി. എട്ട് ഗെയിമുകള്‍ കഴിഞ്ഞപ്പോള്‍ ഇരുവരും ഓരോ ഗെയിം വീതം വിജയിച്ചു. മറ്റു ആറ് ഗെയിമുകളും സമനിലയിലായി. ആകെ 14 ഗെയിമാണ് ചാമ്പ്യന്‍ഷിപ്പിലുള്ളത്. ആദ്യം 7.5 പോയിന്റ് നേടുന്നവര്‍ ജേതാവാകും.