വിവാഹ സമ്മാനമായി ലഭിച്ച ഹോം തിയേറ്റർ പൊട്ടിത്തെറിച്ച് നവവരനും സഹോദരനും മരിച്ചു. നാല് പേര്‍ക്ക് പരിക്കേല്‍ക്കുകയും ചെയ്തു. ഛത്തീസ്ഗഡിലെ കബീർധാം ജില്ലയിലാണ് വിവാഹ സമ്മാനമായി ലഭിച്ച ഹോം തിയേറ്ററാണ് പൊട്ടിത്തെറിച്ചത്. ഹേമേന്ദ്ര മെരാവി(22) തിങ്കളാഴ്ച മറ്റ് കുടുംബാംഗങ്ങള്‍ക്കൊപ്പം വീട്ടിലെ മുറിക്കുള്ളില്‍ വിവാഹ സമ്മാനങ്ങൾ തുറക്കുന്നതിനിടെയാണ് പൊട്ടിത്തെറിയുണ്ടായതെന്ന് കബീർധാം അഡീഷണൽ പൊലീസ് സൂപ്രണ്ട് മനീഷ താക്കൂർ പറഞ്ഞു. മെരാവി സംഭവസ്ഥലത്ത് തന്നെ മരിച്ചു, ഇയാളുടെ സഹോദരൻ രാജ്കുമാറും (30) ചികിത്സയ്ക്കിടെയാണ് മരിച്ചത്. ഒന്നര വയസ്സുള്ള ആൺകുട്ടിയുൾപ്പെടെ മറ്റ് നാല് പേർക്കുമാണ് പരിക്കേറ്റത്.
പരിക്കേറ്റവരെ കവരദയിലെ ജില്ലാ ആശുപത്രിയിൽ പ്രവേശിപ്പിച്ചു. അതേസമയം സ്ഫോടനത്തിന്റെ കൃത്യമായ കാരണം ഇതുവരെ കണ്ടെത്താനായിട്ടില്ലെന്ന് കബീർധാം പൊലീസ് പറഞ്ഞു. ഹോം തിയറ്റർ വച്ചിരുന്ന മുറിയുടെ ഭിത്തിയും മേൽക്കൂരയും സ്ഫോടനത്തില്‍ പൂര്‍ണമായും തകര്‍ന്നു. സ്ഥലത്തെത്തിയ ഫോറൻസിക് വിദഗ്ധരും പൊലീസ് സംഘവും അന്വേഷണം ആരംഭിച്ചു. ഏപ്രിൽ ഒന്നിനാണ് ഹേമേന്ദ്ര മെരാവിയുടെ വിവാഹം നടന്നത്. റായ്പൂരിൽ നിന്ന് 200 കിലോമീറ്റർ അകലെ ഛത്തീസ്ഗഡ് മധ്യപ്രദേശ് അതിർത്തിയിലുള്ള മാവോയിസ്റ്റ് ബാധിത മേഖലയാണ് പ്രദേശം.
English Summary; The wedding gift home theater blast; The new groom and elder brother were killed
You may also like this video
