പൊലീസിനെ കണ്ട് ഭയന്ന് എംഡിഎംഎ പായ്ക്കറ്റുകള് വിഴുങ്ങിയതിനെത്തുടര്ന്ന് മരിച്ച മൈക്കാവ് സ്വദേശി ഷാനിദിന്റെ വയറ്റില് മൂന്ന് പാക്കറ്റുകള് കണ്ടെത്തി. സ്കാന് പരിശോധനയിലാണ് മൂന്നു പാക്കറ്റുകള് കണ്ടെത്തിയത്. രണ്ട് പാക്കറ്റുകളില് ക്രിസ്റ്റല് തരികളും ഒന്നില് ഇല പോലുള്ള ഒരു വസ്തുവുമാണ് കണ്ടെത്തിയത്. ഇല പോലെ കണ്ടെത്തിയത് കഞ്ചാവ് ആണെന്നാണ് പൊലീസിന്റെ പ്രാഥമിക നിഗമനം. ഷാനിദിന്റെ ഇന്ക്വസ്റ്റ് നടത്തി. താമരശ്ശേരി തഹസില്ദാരുടെയും കുന്നമംഗലം ജുഡീഷ്യന് മജിസ്ട്രേറ്റിന്റെയും സാന്നിധ്യത്തിലായിരുന്നു ഇന്ക്വസ്റ്റ്.
എംഡിഎംഎ ശരീരത്തില് കലര്ന്നതാണോ മരണ കാരണമെന്ന് പോസ്റ്റ് മോര്ട്ടത്തിലൂടെയേ വ്യക്തമാകൂവെന്ന് പൊലീസ് അറിയിച്ചു. വെള്ളിയാഴ്ച രാവിലെയാണ് അമ്പായത്തോട് വെച്ച് പൊലീസിനെ കണ്ടതിന് പിന്നാലെ കയ്യിലുണ്ടായിരുന്ന പൊതി ഷാനിദ് വിഴുങ്ങിയത്. ഷാനിദിന്റെ മരണം പേരാമ്പ്ര ഡിവൈഎസ്പിയാണ് അന്വേഷിക്കുന്നത്.