ഇന്ത്യ- പാകിസ്ഥാന് സംഘര്ഷത്തിനിടെ അഞ്ച് ജെററ് വിവാനങ്ങള് തകര്ക്കപ്പെട്ടതായി യുഎസ് പ്രസിഡന്റ് ഡൊണാള്ഡ് ട്രംപ്. വൈറ്റ് ഹൗസില് ഏതാനും റിപ്പബ്ളിക്കന് നിയമസഭാംഗങ്ങള്ക്കൊപ്പമുള്ള അത്താഴ വിരുന്നിടെയായിരുന്നു ട്രംപിന്റെ പരാമര്ശം. എന്നാല് തകര്ന്ന ജെറ്റ് വിമാനങ്ങള് ഇന്ത്യയുടേതാണോ , പാകിസ്ഥാന്റേതാണോ എന്ന് വ്യക്തമാക്കാന് ട്രംപ് തയ്യാറായിട്ടില്ല.
വ്യാപാര കരാര് ഉപയോഗിച്ച് ഇരു രാജ്യങ്ങളും തമ്മിലുള്ള വെടിനിര്ത്തലിന് മധ്യസ്ഥത വഹിച്ചത് താനാണെന്ന് അവകാശവേദം ട്രംപ് വീണ്ടും ഉന്നയിക്കുകയും ചെയ്തു .ഇന്ത്യയും, പാകിസ്ഥാനും തമ്മിലുള്ള പ്രശ്നം ഗുരുതരമായിരുന്നു. വിമാനങ്ങള് വെടിവെച്ചിടുകയായിരുന്നു. യഥാര്ഥത്തില് അഞ്ച് ജെറ്റുകള് വെടിവെച്ചിട്ടെന്നാണ് തോന്നുന്നത്. രണ്ടും ആണവ രാജ്യങ്ങളാണ്, അവര് പരസ്പരം ഏറ്റുമുട്ടുകയായിരുന്നു. പുതിയ യുദ്ധമുഖം തുറക്കുന്നുവെന്നാണ് കരുതിയത്.
ഇറാനില് നമ്മള് എന്താണ് ചെയ്തതെന്ന് കണ്ടതല്ലേ. അവിടെ നമ്മള് അവരുടെ ആണവ ശേഷി തകര്ത്തു, പൂര്ണമായും തകര്ത്തു. പക്ഷേ, ഇന്ത്യയും പാകിസ്ഥാനും സംഘര്ഷവുമായി മുന്നോട്ടുപോകുകയായിരുന്നു. അത് വലുതായിക്കൊണ്ടിരുന്നു. ഒടുവില് വ്യാപാര കരാര് മുന്നിര്ത്തി ഞങ്ങള് അത് പരിഹരിച്ചു. നിങ്ങള് ഒരു വ്യാപാര കരാര് ഉണ്ടാക്കാന് ആഗ്രഹിക്കുന്നില്ലേ എന്ന് ചോദിച്ചു. എന്നാല് നിങ്ങള് ആയുധങ്ങള്, ഒരുപക്ഷേ ആണവായുധങ്ങള് കൊണ്ട് പരസ്പരം ഏറ്റുമുട്ടാന് പോകുകയാണെങ്കില് നിങ്ങളുമായി ഒരു വ്യാപാര കരാര് ഉണ്ടാക്കാന് ഞങ്ങള് ആഗ്രഹിക്കുന്നില്ലെന്ന് ഇരുവരെയും അറിയിച്ചു ട്രംപ് വ്യക്തമാക്കി. മേയ് 10‑ന് ഇന്ത്യയും പാകിസ്ഥാനും വെടിനിര്ത്തല് കരാറില് ഒപ്പുവച്ചതിന് ദിവസങ്ങള്ക്ക് ശേഷം, ഇന്ത്യ നിരവധി ഹൈടെക് പാകിസ്ഥാന് യുദ്ധവിമാനങ്ങള് തകര്ത്തതായി എയര് മാര്ഷല് എ.കെ. ഭാരതി വ്യക്തമാക്കിയിരുന്നു.