തിരുവമ്പാടി അരിപ്പാറ വെള്ളച്ചാട്ടത്തില്‍ വീണ രണ്ട് വിദ്യാര്‍ത്ഥികള്‍ മുങ്ങി മരിച്ചു. കോഴിക്കോട് പാലാഴി സ്വദേശി അശ്വന്ത് കൃഷ്ണ( 15), തിരുവണ്ണൂര്‍ സ്വദേശി അഭിനവ് (13) എന്നിവരാണ് മരിച്ചത്. അപകടത്തില്‍പ്പെട്ട അഞ്ചു പേരില്‍ ബാക്കി മൂന്ന് പേരെ ആശുപത്രിയില്‍ പ്രവേശിപ്പിച്ചു. ഇവരുടെ ആരോഗ്യനില തൃപ്തികരമാണ്. ഉച്ചയ്ക്ക് മൂന്ന് മണിയോടെയാണ് സംഭവം. കുടുംബസമേതമാണ് കുട്ടികള്‍ ഇവിടെ എത്തിയത്.
കുട്ടികള്‍ അടക്കം 14 അംഗ സംഘം ടെമ്പോ ട്രാവലറിലാണ് എത്തിയത്. വെള്ളച്ചാട്ടത്തില്‍ കുളിക്കുന്നതിനിടെ അഞ്ചുകുട്ടികള്‍ കയത്തില്‍ അകപ്പെടുകയായിരുന്നു. ഓടിയെത്തിയ ലൈഫ് ഗാര്‍ഡുകള്‍ ആദ്യം മൂന്ന് കുട്ടികളെ പുറത്തെടുത്തത്. എന്നാല്‍ എത്ര കുട്ടികള്‍ അപകടത്തില്‍പ്പെട്ടു എന്ന് ആദ്യം മനസിലായിരുന്നില്ല. തുടര്‍ന്ന് കുട്ടികള്‍ പറഞ്ഞത് അനുസരിച്ച് തെരച്ചില്‍ നടത്തിയപ്പോഴാണ് മറ്റു രണ്ടു കുട്ടികളെ കിട്ടിയത്. ഇവരെ തൊട്ടടുത്ത ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
English Summary:Two children drowned in Aripara water Falls, Kozhikode
You may also like this video
