തിരുവനന്തപുരം മൃഗശാലയില്‍ നിന്ന് ഹനുമാന്‍ കുരങ്ങുകള്‍ ചാടിപ്പോയി. നേരത്തെ ചാടിപ്പോയ പെണ്‍കുരങ്ങിനൊപ്പം രണ്ടെണ്ണംകൂടി കൂട്ടില്‍ നിന്ന് വെളിയില്‍ച്ചാടി. ഇന്ന് രാവിലെ മുതല്‍ മൂന്ന് ഹനുമാൻ കുരങ്ങുകളെ കാണ്മാനില്ലെന്ന് അധികൃതര്‍ പറയുന്നു.
നാല് ഹനുമാന്‍ കുരങ്ങുകളായിരുന്നു കൂട്ടിലുണ്ടായിരുന്നത്. ഇതില്‍ മൂന്ന് പെൺ കുരങ്ങുകളുമുണ്ടായിരുന്നു. ഇവയിൽ ഒരെണ്ണം മൂന്ന് മാസങ്ങൾക്ക് മുൻപ് മൃഗശാലയിൽ നിന്ന് ചാടിപ്പോയ ഹനുമാൻ കുരങ്ങാണെന്ന് മൃഗശാല അധികൃതർ പറയുന്നു. കുരങ്ങുകള്‍ മൃഗശാലക്കുള്ളിലെ മരത്തിന് മുകളിൽ ഉണ്ട്. മയക്കുവെടി വച്ച് കുരങ്ങുകളെ പിടികൂടുക പ്രായോഗികമല്ലെന്നും തീറ്റ കാണിച്ച് താഴെയിറക്കാനാണ് ഇപ്പോള്‍ ശ്രമിക്കുന്നതെന്നും അധികൃതര്‍ പറഞ്ഞു.