കലാപബാധിതമായ മണിപ്പൂരിൽ കേന്ദ്ര‑സംസ്ഥാന സർക്കാരുകൾ വേഗത്തിൽ സമാധാനം പുനഃസ്ഥാപിക്കണമെന്നും ആഭ്യന്തരമായി കുടിയൊഴിപ്പിക്കപ്പെട്ടവരുടെ തകർന്ന വീടുകൾ പുനർനിർമിക്കണമെന്നും ആവശ്യപ്പെട്ട് ഡൽഹിയിലെ ജന്തർമന്തറിൽ വടക്കുകിഴക്കൻ സംസ്ഥാനങ്ങളിലെ വിദ്യാര്‍ത്ഥികള്‍ പ്രതിഷേധിച്ചു.
മണിപ്പൂരിനെ വിഭജിക്കാനുള്ള ശ്രമങ്ങളാണ് കേന്ദ്ര സര്‍ക്കാരിന്റെ ഭാഗത്തുനിന്നുണ്ടാകുന്നത്. പ്രത്യേക ഭരണം വേണ്ട എന്നാവശ്യപ്പെട്ട് വിദ്യാര്‍ത്ഥികള്‍ പ്ലക്ക് കാര്‍ഡുകള്‍ ഉയര്‍ത്തി. മണിപ്പൂരിന്റെ പ്രാദേശിക സമഗ്രത സംരക്ഷിക്കണമെന്നും വിദ്യാര്‍ത്ഥികള്‍ ആവശ്യപ്പെട്ടു.
2023 മെയ് മാസത്തിൽ ആരംഭിച്ച വംശീയ അക്രമം സംസ്ഥാനത്തെ യുവാക്കളെ ആഴത്തിൽ ബാധിച്ചിട്ടുണ്ടെന്ന് “സേവ് മണിപ്പൂർ” പ്രതിഷേധത്തിന്റെ സംഘാടകർ പ്രസ്താവനയിൽ പറഞ്ഞു.
“മണിപ്പൂരിന്റെ സമാധാനത്തിനും ഐക്യത്തിനും മുൻഗണന നൽകണം. ബ്രിട്ടീഷ് അധിനിവേശത്തിന്റെ ഫലമായി കൊണ്ടുവന്ന ഭിന്നതകൾ മാറ്റിവെച്ച് തദ്ദേശവാസികൾ ഐക്യം നിലനിർത്തണം. ദേശവിരുദ്ധ വികാരങ്ങൾ സൃഷ്ടിക്കാൻ ശ്രമിക്കുന്ന ഘടകങ്ങൾ വിജയിക്കാൻ അനുവദിക്കരുത്. ഇന്ത്യൻ ദേശീയ താൽപ്പര്യവും മണിപ്പൂരിലെ തദ്ദേശവാസികളുടെ താൽപ്പര്യങ്ങളും ഒന്നുതന്നെയാണ്,” പ്രതിഷേധത്തിൽ പങ്കെടുത്ത ആറ് പ്രസംഗകരിൽ ഒരാളായ ചരിത്രകാരനും ജിയോപൊളിറ്റിക്കൽ അനലിസ്റ്റുമായ അഭിജിത് ചാവ്ദ യോഗത്തിൽ പറഞ്ഞു. അയൽരാജ്യമായ മ്യാൻമറിലെ പ്രതിസന്ധിയെക്കുറിച്ചും ചാവ്ദ ചൂണ്ടിക്കാട്ടി.
മണിപ്പൂർ ഇന്നൊവേറ്റീവ് യൂത്ത് ഓർഗനൈസേഷനും (മയ്യോണ്ട്) യുണൈറ്റഡ് കാക്കിംഗ് സ്റ്റുഡന്റ്സ് (യുണികാസ്) ഡൽഹിയും ചേർന്നാണ് പ്രതിഷേധം സംഘടിപ്പിച്ചത്. ഡൽഹി സർവകലാശാലയിലെ നോർത്ത് ഈസ്റ്റ് സ്റ്റുഡന്റ്സ് സൊസൈറ്റി പിന്തുണ നല്‍കിയതായും സംഘടന പറഞ്ഞു.
മണിപ്പൂരില്‍ കഴിഞ്ഞവര്‍ഷം ആരംഭിച്ച സംഘര്‍ഷങ്ങളില്‍ 220-ലധികം ആളുകൾ കൊല്ലപ്പെടുകയും 50,000‑ത്തോളം പേർ ആഭ്യന്തരമായി പലായനം ചെയ്യുകയും ചെയ്തു.