രഹസ്യ സൈനിക ഇന്റലിജൻസ്, കരീബിയൻ ബോട്ട് ആക്രമണങ്ങൾ എന്നിവ തെറ്റായി കൈകാര്യം ചെയ്തതിനെത്തുടര്ന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് പ്രതിസന്ധിയില്. ട്രംപ് ഭരണകൂടം മയക്കുമരുന്ന് കള്ളക്കടത്തുകാർക്കെതിരെ നടത്തിയ കരീബിയൻ ആക്രമണവുമായി ബന്ധപ്പെട്ട യുദ്ധക്കുറ്റ ആരോപണങ്ങളും ക്തിഗത സന്ദേശമയയ്ക്കൽ ആപ്പ് വഴി രഹസ്യ ഇന്റലിജൻസ് ദുരുപയോഗം ചെയ്തതായി ആരോപിച്ച് ഇൻസ്പെക്ടർ ജനറൽ നൽകിയ റിപ്പോര്ട്ടുമാണ് ഹെഗ്സെത്തിന് വിനയായത്. രാജി ആവശ്യമുന്നയിച്ച് സമ്മര്ദം ശക്തമാണെങ്കിലും പ്രസിഡന്റ് ഡൊണാൾഡ് ട്രംപിന്റെ അചഞ്ചലമായ പിന്തുണ ഹെഗ്സെത്തിന് ലഭിക്കുന്നുണ്ട്.
സെപ്റ്റംബർ മുതൽ 22 ആക്രമണങ്ങളിലായി കുറഞ്ഞത് 87 പേരുടെ മരണത്തിന് കാരണമായ കരീബിയൻ ആക്രമണങ്ങളെ, ഫെന്റനൈൽ കടത്ത് തടയുന്നതിൽ നിർണായകമാണെന്നാണ് ട്രംപ് ന്യായീകരിക്കുന്നത്. നശിപ്പിക്കപ്പെട്ട ഓരോ കപ്പലും 25,000 അമേരിക്കൻ ജീവൻ രക്ഷിച്ചുവെന്ന് ഭരണകൂടം അവകാശപ്പെടുന്നു. വെനസ്വേലയിൽ നിന്നുള്ള ബോട്ടിലൂടെയല്ല, മെക്സിക്കോയിൽ നിന്ന് കരമാർഗമാണ് മിക്ക ഫെന്റനൈലും അമേരിക്കയിലേക്ക് പ്രവേശിക്കുന്നത് എന്നതിനാൽ, വസ്തുതാ പരിശോധകരും നയ വിദഗ്ധരും ഈ കണക്കിനെ വ്യാപകമായി വിമർശിച്ചു.
സെപ്റ്റംബർ രണ്ടിലെലെ ആക്രമണത്തിൽ നിന്ന് രക്ഷപ്പെട്ട രണ്ട് പേർ തുടർന്നുള്ള “ഡബിൾ‑ടാപ്പ്” ആക്രമണത്തിൽ കൊല്ലപ്പെട്ടുവെന്ന റിപ്പോർട്ടുകൾ പുറത്തുവന്നതിനെത്തുടർന്ന് യുഎസിന്റെ സെെനിക നടപടിയുടെ നിയമസാധുതയെക്കുറിച്ച് ചോദ്യങ്ങളുയര്ന്നു. ഇവരെ കൊലപ്പെടുത്താന് ഹെഗ്സെത്ത് വാക്കാല് നിര്ദേശം നല്കിയെന്നാണ് വിവരം. ഈ റിപ്പോർട്ടുകൾ കെട്ടിച്ചമച്ചതാണെന്ന് വാദിച്ച് ഹെഗ്സെത്ത് ഇത് തള്ളിക്കളഞ്ഞിരുന്നു. ആക്രമണങ്ങളുടെ കമാൻഡ് ശൃംഖല വ്യക്തമാക്കാന് പെന്റഗണിന് സാധിച്ചിട്ടില്ല. വൈറ്റ് ഹൗസിൽ നിന്നും ഹെഗ്സെത്തിൽ നിന്നുമുള്ള പരസ്പരവിരുദ്ധമായ പ്രസ്താവനകൾ, ആക്രമണത്തിന് ആരാണ് അനുമതി നൽകിയതെന്ന ആശയക്കുഴപ്പം സൃഷ്ടിച്ചു. പ്രവർത്തന വിശദാംശങ്ങളെക്കുറിച്ച് അറിയില്ലെന്നാണ് ട്രംപിന്റെ വിശദീകരണം. അതിജീവിച്ചവരെ ആക്രമിക്കാന് താൻ അനുമതി നൽകുമായിരുന്നില്ലെന്നും അദ്ദേഹം സൂചിപ്പിച്ചു.
യെമൻ വ്യോമാക്രമണങ്ങൾക്കായുള്ള മുന്നൊരുക്ക ഇന്റലിജൻസ് വിവരങ്ങൾ സിഗ്നൽ ആപ്പ് വഴി പങ്കുവച്ചതിലൂടെ ഹെഗ്സെത്ത് പെന്റഗൺ നയങ്ങൾ ലംഘിച്ചുവെന്ന് നിഗമനം ചെയ്യുന്ന ഒരു ഡിപ്പാർട്ട്മെന്റ് ഓഫ് ഡിഫൻസ് ഇൻസ്പെക്ടർ ജനറൽ റിപ്പോർട്ട് പുറത്തുവന്നതോടെ പ്രതിസന്ധി രൂക്ഷമായി. ഒരു വ്യക്തിഗത സംവിധാനത്തില് നിന്ന് രഹസ്യ വിവരങ്ങൾ കൈമാറുന്നത് പ്രവർത്തന സുരക്ഷയെ മാത്രമല്ല, ഫെഡറൽ റെക്കോർഡ് സൂക്ഷിക്കൽ ആവശ്യകതകളെയും ലംഘിച്ചുവെന്നാണ് കണ്ടെത്തല്.