അടുപ്പില്ലാത്ത
അടുക്കളയാണ് സ്വപ്‌നം.
കരിയും വെണ്ണീറും
അവശ്യത്തിലേറെ
മനസ്സിൽ അടിഞ്ഞുകിടപ്പുണ്ട്.
പാത്രങ്ങളിൽ പറ്റിപ്പിടിച്ച
തുപ്പൽമൂടിയ എച്ചിലുകൾ
തൊണ്ടക്കുഴിയിൽ
ഓച്ഛാനിച്ചു നിൽപ്പുണ്ട്.
മീൻ തല തേടിവരുന്ന പൂച്ച
തൈരും അച്ചാറും രസവും കൂട്ടി
ചോറു കഴിക്കുന്നതാണ് സ്വപ്‌നം
വരണ്ടു പീളകെട്ടിയ
രണ്ടു കണ്ണുകളിൽ
കിട്ടാക്കനിയായി
പൂച്ചയുറക്കം
കൊതിച്ചുകിടപ്പുണ്ട്.
വല നെയ്‌തു വല നെയ്‌തു
അടുക്കളച്ചുവരുകളിൽ
ഇരയെക്കാത്തിരിക്കുന്ന
എലുമ്പൻ കാലുകളാണ് സ്വപ്‌നം
എത്ര തൂത്തിട്ടും
കൊഴിഞ്ഞുപോവാത്ത
മാറാലമൂടിയ ഹൃദയത്തിൽ
കൂർത്ത കഴുകൻ കാൽനഖങ്ങൾ
ചുവന്ന ചിത്രങ്ങൾ വരയ്‌ക്കുന്നുണ്ട്.
അടുപ്പില്ലാത്ത
അടുക്കളയാണ് സ്വപ്‌നം.
അടുക്കളയില്ലാതെ
വീടാണ് സ്വപ്‌നം.