ഡല്ഹിയില് 27 വര്ഷങ്ങള്ക്ക് ശേഷം ബിജെപി അധികാരത്തില് തിരിച്ചെത്തുന്നു.ബിജെപിയുടെ വിജയത്തിനൊപ്പം കോണ്ഗ്രസ്, ആപ്പ് പാളയത്തിലും പൊട്ടിത്തെറികള് ശക്തമാണ് ആം ആദ്മി പാര്ട്ടിയെ ജയിപ്പിക്കേണ്ട ആവശ്യം ഞങ്ങള്ക്കില്ലെന്നും എഎപിയുടെ വിജയം കോണ്ഗ്രസിന്റെ ഉത്തരവാദിത്വമല്ലെന്നുമാണ് ഡല്ഹിയിലെ കോണ്ഗ്രസ് വക്താവായ സുപ്രിയ ശ്രീനേറ്റ് ഒരു സ്വകാര്യ ചാനലിനോട് അഭിപ്രായപ്പെട്ടു 15 വര്ഷത്തോളം ഞങ്ങള് ഭരിച്ച മണ്ണാണ് ഡല്ഹി. തുടര്ന്നും ഞങ്ങള്ക്ക് സാധ്യതയുള്ള തട്ടകമാണിതെന്നും കോണ്ഗ്രസ് വക്താവ് അഭിപ്രായപ്പെടുന്നു.
ഈ തിരഞ്ഞെടുപ്പില് ആവേശകരമായ പ്രചാരണം നടത്തുകയെന്നതും ശക്തമായ മത്സരം സൃഷ്ടിക്കുകയുമായിരുന്നു ഞങ്ങളുടെ ലക്ഷ്യം. ഇത് ഭംഗിയായി നിര്വഹിച്ചിട്ടുണ്ട്. അല്ലാതെ ആപ്പിനെ ജയിപ്പിക്കേണ്ട ഉത്തരവാദിത്വം ഞങ്ങള്ക്കില്ലെന്നും സുപ്രിയ കൂട്ടിച്ചേര്ത്തു. അരവിന്ദ് കെജ്രിവാള് ഗോവ, ഹരിയാന, ഗുജറാത്ത്, ഉത്തരാഖണ്ഡ് തുടങ്ങിയ സംസ്ഥാനങ്ങളില് തിരഞ്ഞെടുപ്പില് മത്സരിക്കാന് പോയിരുന്നു. ഗോവയിലും ഉത്തരാഖണ്ഡിലും ആപ്പിന് ലഭിച്ച വോട്ടായിരുന്നു കോണ്ഗ്രസും ബിജെപിയും തമ്മിലുള്ള വോട്ട് വ്യത്യാസം. എഎപി. മത്സരിച്ചില്ലായിരുന്നുവെങ്കില് കോണ്ഗ്രസിന് ബിജെപിയെ തോല്പ്പിക്കാനുള്ള സാഹചര്യം ഈ സംസ്ഥാനങ്ങളില് ഉണ്ടായിരുന്നു എന്നാണ് കോണ്ഗ്രസ് അവകാശപ്പെടുന്നത്.
ഗോവ നിയമസഭാ തിരഞ്ഞെടുപ്പില് 40.3 ശതമാനമായിരുന്നു ബിജെപിയുടെ വോട്ടുവിഹിതം. അതേസമയം, കോണ്ഗ്രസിന് 13.5 ശതമാനവും ആപ്പിന് 12.8 ശതമാനവുമായിരുന്നു വോട്ടുവിഹിതം. ഉത്തരാഖണ്ഡില് ബിജെപിക്ക് 44.3 ശതമാനം വോട്ട് ലഭിച്ചപ്പോള് കോണ്ഗ്രസിന് 37.9 ശതമാനം വോട്ടും എഎപിക്ക് 4.82 ശതമാനം വോട്ടും മാത്രമാണ് ലഭിച്ചത്. കടലാസില് എഎപി കോണ്ഗ്രസിന്റെ സഖ്യമാണെങ്കിലും ഇന്ത്യ ബ്ലോക്കിന്റെ നേതൃത്വത്തെ ചൊല്ലി കോണ്ഗ്രസിനെ വിമര്ശിക്കുകയും മൂന്നാം തവണയും ഒറ്റയ്ക്ക് അധികാരം പിടിച്ചെടുക്കാന് ശ്രമിക്കുകയായിരുന്നുവെന്നും കോണ്ഗ്രസ് കുറ്റപ്പെടുത്തി.
ബിജെപിയെ പ്രതിരോധിക്കുന്നതിനായി 2023 ജൂണിലാണ് ഇന്ത്യ ബ്ലോക്ക് ആരംഭിക്കുന്നത്. എന്നാല്, അതിനുശേഷം നടന്ന തിരഞ്ഞെടുപ്പുകളിലും നേട്ടുമുണ്ടാക്കാന് ഇന്ത്യ സഖ്യത്തിന് സാധിച്ചില്ല. ഹരിയാനയിലും മഹാരാഷ്ട്രയിലും കോണ്ഗ്രസിനുണ്ടായ കനത്ത തോല്വിയെ തുടര്ന്ന് ഇന്ത്യ ബ്ലോക്കിലും അസ്വാരസ്യങ്ങള് ഉടലെടുത്തിരുന്നു. ശിവസേന ഉദ്ധവ് താക്കറെ വിഭാഗം, ശരദ് പവാറിന്റെ നാഷണലിസ്റ്റ് കോണ്ഗ്രസ് തുടങ്ങിയ പാര്ട്ടികള് ഡല്ഹി തിരഞ്ഞെടുപ്പില് എഎപിക്കൊപ്പമായിരുന്നുവെന്നാണ് കോണ്ഗ്രസ് ആരോപിക്കുന്നത്.