ആഗോള സാമ്പത്തിക പ്രതിസന്ധിക്കിടയില് പിരിച്ചുവിടൽ തുടര്ന്ന് കോര്പറേറ്റ് ഭീമന്മാര്. അടുത്ത മൂന്ന് വർഷത്തിനുള്ളിൽ 11,000 തൊഴിലവസരങ്ങൾ വെട്ടിക്കുറയ്ക്കുമെന്ന് ടെലികോം ഭീമനായ വോഡഫോണിന്റെ പ്രഖ്യാപനം. ടെലികോം ഗ്രൂപ്പിന്റെ ചരിത്രത്തിലെ ഏറ്റവും വലിയ വെട്ടിക്കുറയ്ക്കലാണിത്. വോഡഫോണില് ജോലി ചെയ്യുന്ന 1,04,000 ജീവനക്കാരില് പത്തിലൊന്ന് പേര്ക്കാണ് തൊഴില് നഷ്ടമാകുക. കമ്പനിയുടെ ബെർക്ക്ഷെയറിലെ ആസ്ഥാനത്ത് ഉൾപ്പെടെ യുകെയിൽ മാത്രം ഏകദേശം 9,000 പേർ ജോലി ചെയ്യുന്നു. കഴിഞ്ഞ മാസം വോഡഫോണിന്റെ ആദ്യ വനിതാ ചീഫ് എക്സിക്യൂട്ടീവായി നിയമിതയായ മാർഗരിറ്റ ഡെല്ല വാലെയുടെ നിര്ദേശമനുസരിച്ചാണ് പുതിയ നീക്കം. പ്രകടനം വേണ്ടത്ര മികച്ചതല്ലെന്നും കമ്പനിയില് മാറ്റങ്ങള് വരേണ്ടതുണ്ടെന്നും ചുമതലയേറ്റെടുത്തതിന് ശേഷം അവര് പ്രസ്താവിച്ചിരുന്നു. വോഡഫോണിന്റെ ആസ്ഥാന ഓഫിസിലാകും ഏറ്റവും കൂടുതല് തൊഴിലാളികളെ പിരിച്ചുവിടുക. വോഡഫോൺ ബ്രാൻഡിനെ പുനരുജ്ജീവിപ്പിക്കാൻ 100 മില്യൺ യൂറോയും (87 മില്യൺ പൗണ്ട്) ഉപഭോക്തൃ അനുഭവം മെച്ചപ്പെടുത്താൻ 150 മില്യൺ യൂറോയുടെയും ചെലവ് വെട്ടിക്കുറയ്ക്കാനാണ് പദ്ധതി. ബ്രിട്ടനിലെ ഏറ്റവും വലിയ മൊബൈൽ ഓപ്പറേറ്ററാകുക എന്ന ലക്ഷ്യത്തോടെ സികെ ഹച്ചിസണുമായുള്ള വോഡഫോണിന്റെ ലയന ചര്ച്ചകള് അവസാനഘട്ടത്തിലാണ്. യഥാക്രമം യുകെയിലെ മൂന്നാമത്തെയും നാലാമത്തെയും വലിയ മൊബൈൽ ഓപ്പറേറ്റർമാരായ വോഡഫോണിന്റെയും സികെ ഹച്ചിസണിന്റെയും ലയനം കമ്പനിക്ക് 27 ദശലക്ഷത്തിലധികം വരിക്കാരെ സൃഷ്ടിക്കുമെന്നാണ് വിലയിരുത്തുന്നത്. അതിനിടെ, വോഡഫോണിന് പിന്നാലെ പിരിച്ചുവിടല് പ്രഖ്യാപനവുമായി ആമസോണും രംഗത്തെത്തി. ആമസോൺ ഇന്ത്യയിൽ 500 ഓളം ജീവനക്കാരെയാണ് പിരിച്ചുവിട്ടത്. മാർച്ചിൽ സിഇഒ ആൻഡി ജാസി പ്രഖ്യാപിച്ച പിരിച്ചുവിടലുകളുടെ ഭാഗമാണിത്. ഏകദേശം 9,000 ജീവനക്കാരെ പ്രഖ്യാപനം ബാധിക്കും. വെബ് സേവനങ്ങൾ, ഹ്യൂമൻ റിസോഴ്സ്, സപ്പോർട്ട് ഡിപ്പാർട്ട്മെന്റ് എന്നിവയിൽ നിന്ന് ജീവനക്കാര്ക്കാണ് തൊഴില് നഷ്ടമായത്. ഇന്ത്യയിൽ നിന്ന് പ്രവർത്തിക്കുന്ന ആമസോണിന്റെ ഗ്ലോബൽ ടീമുകളുടെ ഭാഗമാണ് ഈ ജീവനക്കാര്. ലോകമെമ്പാടുമുള്ള ടെക് ഓഹരികൾ ഇടിഞ്ഞതിനെ തുടർന്ന് ഏകദേശം 18,000 ജീവനക്കാരെ പിരിച്ചുവിടുമെന്ന് ജനുവരിയിൽ കമ്പനി ആദ്യം പ്രഖ്യാപിച്ചിരുന്നു. ഇന്ത്യയിലെ ആമസോണിന്റെ ഇ‑കൊമേഴ്സ് ബിസിനസ് വളർച്ചയിൽ മാന്ദ്യം നേരിടുന്നുണ്ടെന്നാണ് വിലയിരുത്തല്. നിക്ഷേപ ബാങ്ക് ഭീമനായ മോർഗൻ സ്റ്റാൻലി തങ്ങളുടെ ഏഷ്യ‑പസഫിക് ഇൻവെസ്റ്റ്മെന്റ് ബാങ്കിങ് തൊഴിലാളികളുടെ ഏഴ് ശതമാനം വെട്ടിക്കുറയ്ക്കുമെന്ന് പ്രഖ്യാപിച്ചിട്ടുണ്ട്. എന്നാല് ജോലി വെട്ടിക്കുറയ്ക്കുന്നത് സംബന്ധിച്ച് അന്തിമ തീരുമാനമെടുത്തിട്ടില്ലെന്നും ബ്ലൂംബര്ഗ് പുറത്തുവിട്ട റിപ്പോര്ട്ടില് പറയുന്നു. ഈ വർഷം അവസാനത്തോടെ ആഗോളതലത്തിൽ 3,000 തൊഴിലവസരങ്ങൾ കുറയ്ക്കാനാണ് ബാങ്കിന്റെ തീരുമാനം. മോർഗൻ സ്റ്റാൻലി ഹോങ്കോങ്ങിൽ വിന്യസിച്ചിരിക്കുന്ന ചെെനീസ് സംഘത്തെയാകും വെട്ടിക്കുറയ്ക്കല് ബാധിക്കുക. യുഎസും ചൈനയും തമ്മിലുള്ള ബന്ധം വഷളായതോടെ കരാർ പ്രവർത്തനം മന്ദഗതിയിലാണ്. ഇതിനെത്തുടര്ന്ന് കഴിഞ്ഞ വർഷം അവസാനത്തോടെ ഏഷ്യയിലെ ഏകദേശം 50 നിക്ഷേപ ബാങ്കിങ് ജോലികൾ സ്ഥാപനം വെട്ടിക്കുറച്ചിരുന്നു. അതേസമയം, 2025 ഓടെ ഫ്രാൻസിലെ ജീവനക്കാരുടെ എണ്ണം 200 ആക്കാനും രാജ്യത്തെ മൊത്തം ജീവനക്കാരുടെ എണ്ണം 500 ആയി ഉയർത്താനും സ്ഥാപനം പദ്ധതിയിടുന്നു. യൂറോപ്യൻ യൂണിയനിൽ ബ്രിട്ടൻ പുറത്തായതിന്റെ പശ്ചാത്തലത്തിൽ യൂറോപ്യൻ യൂണിയനിലുടനീളം പ്രവർത്തനം കെട്ടിപ്പടുക്കുന്നതിൽ ബാങ്ക് ഓഫ് അമേരിക്ക, ഗോൾഡ്മാൻ സാച്ച്സ്, സിറ്റിഗ്രൂപ്പ് തുടങ്ങിയ മറ്റ് യുഎസ് സ്ഥാപനങ്ങളുടെ പാതയാണ് മോര്ഗന് സ്റ്റാന്ലി പിന്തുടരുന്നത്.
english summary; Vodafone lays off 10,000 workers
you may also like this video
