രാത്രിയില്‍ നഗ്നനായി നടന്ന് ആളുകളെ ഭയപ്പെടുത്തി പിടിയിലായ കുപ്രസിദ്ധ മോഷ്ടാവ് വാട്ടര്‍ മീറ്റര്‍ കബീര്‍ വീണ്ടും പൊലീസ് പിടിയില്‍. ഈ കേസില്‍ റിമാന്‍ഡ് കാലാവധി കഴിഞ്ഞ് പുറത്തിറങ്ങിയതിന് പിന്നാലെയാണ് പുതിയ മോഷണക്കേസില്‍ കബീര്‍ അറസ്റ്റിലാവുന്നത്.
തിങ്കളാഴ്ച പുലര്‍ച്ചെ മലപ്പുറം കോട്ടക്കലിന് സമീപം എടരിക്കോട് എംഎം വെജിറ്റബിള്‍സ് ആന്‍ഡ് ഫ്രൂട്ട്‌സ് എന്ന സ്ഥാപനത്തിന്റെ പൂട്ട് തകര്‍ത്താണ് മോഷണം നടത്തിയത്. തമിഴ്‌നാട് ഗൂഡല്ലൂര്‍ സ്വദേശിയായ മേലേത്ത് വീട്ടില്‍ അബ്ദുല്‍ കബീര്‍ (50) പിടിയിലായത്. പതിനഞ്ചോളം മോഷണക്കേസുകളില്‍ ഇയാള്‍ പ്രതിയാണ്. മോഷണം നടന്ന് മണിക്കൂറുകള്‍ക്കകമാണ് കോട്ടക്കല്‍ പൊലീസ് ഇയാളെ അറസ്റ്റ് ചെയ്യുന്നത്.
രാത്രിയില്‍ ഒരു പ്രദേശത്ത് ആളില്ലാത്ത വീടുകളും കടകളും കുത്തിത്തുറന്ന് പരമാവധി മോഷണം നടത്തുന്ന രീതിയാണ് പ്രതിക്കുള്ളതെന്ന് പൊലീസ് പറഞ്ഞു. കഴിഞ്ഞ വര്‍ഷം കണ്ണൂരിലാണ് രാത്രിയില്‍ നഗ്നനായി നടന്ന് ജനങ്ങളെ ഭയപ്പാടിലാഴ്ത്തിയ ശേഷം വീടുകള്‍ കുത്തിത്തുറന്ന് മോഷണ പരമ്പര നടത്തിയ കേസില്‍ ഇയാള്‍ പിടിയിലാവുന്നത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
English Summary;Water meter Kabir arrested again; Stealing by walking naked at night
You may also like this video
