മുണ്ടക്കൈ–ചൂരൽമല ദുരന്തബാധിതരോടുള്ള കേന്ദ്ര അവഗണനയിൽ ഒറ്റക്കെട്ടായി പ്രതിഷേധിച്ച്‌ വയനാട്. ഉരുൾപൊട്ടൽ ദേശീയദുരന്തമായി പ്രഖ്യാപിച്ച്‌ സഹായം നൽകണമെന്ന സംസ്ഥാന സർക്കാരിന്റെ ആവശ്യം നിരാകരിച്ചതിനെതിരെ എൽഡിഎഫ് നടത്തിയ ഹർത്താലിൽ ജില്ല പൂര്‍ണമായും സ്തംഭിച്ചു. കടകമ്പോളങ്ങള്‍ അടഞ്ഞുകിടന്നു. അവശ്യസര്‍വീസുകള്‍ മാത്രമാണുണ്ടായിരുന്നത്. ഹർത്താലിന്റെ ഭാഗമായി വിവിധ കേന്ദ്രങ്ങളിൽ പ്രകടനവും റോഡ്‌ ഉപരോധവും നടന്നു. കല്പറ്റയിൽ പ്രതിഷേധം എൽഡിഎഫ് ജില്ലാ കൺവീനർ സി കെ ശശീന്ദ്രൻ ഉദ്‌ഘാടനം ചെയ്‌തു. പ്രകടനത്തിന് എൽഡിഎഫ് നേതാക്കളായ പി കെ അനിൽകുമാർ, കെ റാഫീഖ്‌, കെ സുഗതൻ, വി ഹാരിസ്‌, വി ബാവ, ടി ജി ബീന, എസ് സൗമ്യ എന്നിവർ നേതൃത്വം നൽകി. യുഡിഎഫും ഹര്‍ത്താലിന് ആഹ്വാനം നല്‍കിയിരുന്നു.
വയനാട് ഹ‍ര്‍ത്താല്‍ പൂര്‍ണ്ണം
