ഏകദിന ക്രിക്കറ്റ് ചരിത്രത്തിലെ ഏറ്റവും ഉയര്‍ന്ന സ്കോര്‍ എന്ന റെക്കോഡ് ഇനി ഇംഗ്ലണ്ടിന് സ്വന്തം. നെതര്‍ലന്‍ഡ്സിനെതിരായ ഏകദിന പരമ്പരയിലെ ആദ്യ മത്സരത്തില്‍ 50 ഓവറിൽ നാല് വിക്കറ്റ് നഷ്ടത്തിൽ ഇംഗ്ലണ്ട് നേടിയത് 498 റൺസാണ്. ജോസ് ബട്‌ലര്‍ (70 പന്തിൽ പുറത്താകാതെ 162), ഡേവിഡ് മലന്‍ (109 പന്തിൽ 125), ഫിലിപ്പ് സാള്‍ട്ട് ( 93 പന്തിൽ 122) എന്നിവരുടെ സെഞ്ചുറികളുടെയും ലിയാം ലിവിങ്‌സ്റ്റണിന്റെ (22 പന്തില്‍ 66) വെടിക്കെട്ട് അര്‍ധസെഞ്ചുറിയുടെയും മികവിലാണ് ഇംഗ്ലണ്ടിന്റെ പടുകൂറ്റന്‍ സ്കോര്‍. 2018 ജൂണ്‍ 19‑ന് നോട്ടിങ്ങാമില്‍ ഓസ്‌ട്രേലിയയ്ക്കെതിരേ ആറു വിക്കറ്റിന് 481 റണ്‍സ് നേടിയ തങ്ങളുടെ തന്നെ റെക്കോഡാണ് ഇംഗ്ലണ്ട് ഈ മത്സരത്തോടെ പഴങ്കഥയാക്കിയത്. ഇന്നിങ്സിലെ അവസാന പന്തില്‍ സിക്സ് അടിച്ചെങ്കിലും രണ്ട് റണ്‍സകലെ ഏകദിന ക്രിക്കറ്റിലെ ആദ്യ 500 റണ്‍സ് ഇംഗ്ലണ്ടിന് നഷ്ടമായി.
English Summary:World record for England in cricket
You may also like this video
