ലോകമെമ്പാടുമുള്ള ദശലക്ഷക്കണക്കിന് അഭയാർത്ഥികൾക്കുള്ള സാമ്പത്തിക സഹായം സമാഹരിക്കുന്നതില് അന്താരാഷ്ട്ര സംഘടനകള് പരാജയപ്പെട്ടതായി റിപ്പോര്ട്ട്. 2023ൽ ആവശ്യപ്പെട്ട 10 ദശലക്ഷം യുഎസ് ഡോളറിന്റെ 22 ശതമാനം മാത്രമാണ് ആറ് മാസങ്ങള്ക്കുള്ളില് സമാഹരിക്കാനായത്. 108.4 ദശലക്ഷം ആളുകള് 2022 അവസാനത്തോടെ ലോകമെമ്പാടും കുടിയിറക്കപ്പെട്ടു. രണ്ടാം ലോക മഹായുദ്ധത്തിനു ശേഷമുള്ള ഏറ്റവും ഉയർന്ന എണ്ണമാണിത്. തുർക്കി (3.6 ദശലക്ഷം), ഇറാൻ (3.4 ദശലക്ഷം), കൊളംബിയ (2.5 ദശലക്ഷം), ജർമ്മനി (2.1 ദശലക്ഷം), പാകിസ്ഥാൻ (1.7 ദശലക്ഷം) എന്നിവയാണ് ഏറ്റവും കൂടുതൽ അഭയാർത്ഥികളുള്ള രാജ്യങ്ങള്. സുഡാനിലെ നിലവിലെ സംഘർഷം വൻതോതിൽ കുടിയൊഴിപ്പിക്കലിന് കാരണമായി.
ഒരു ദശലക്ഷത്തിലധികം ആളുകള് രാജ്യത്ത് നിന്ന് കുടിയിറക്കപ്പെട്ടു. കഴിഞ്ഞ 30 വർഷമായി, കെനിയയിലെ ദാദാബ് ലോകത്തിലെ ഏറ്റവും വലിയ അഭയാർത്ഥി സെറ്റിൽമെന്റുകളിൽ ഒന്നാണ്. ദാദാബിലെ പല കുടുംബങ്ങളും പട്ടിണിയിലാണ് ഒരോ ദിവസവും കഴിച്ചുകൂട്ടുന്നത്. ധനസഹായം വെട്ടിക്കുറച്ചതിനാൽ, ഓരോ അഭയാർത്ഥിക്കും ഇപ്പോൾ ശുപാർശ ചെയ്യുന്ന ഭക്ഷ്യ റേഷനുകളുടെ 80 ശതമാനം മാത്രമേ ലഭിക്കുന്നുള്ളൂ. മതിയായ ഫണ്ട് ഇല്ലെങ്കിൽ റേഷൻ ഇനിയും കുറയും. അഭയാർത്ഥികളിൽ ഭൂരിഭാഗവും (ഏകദേശം 85 ശതമാനം) വികസ്വര രാജ്യങ്ങളിലാണ്. അഭയാർത്ഥികൾക്ക് ആതിഥേയ രാജ്യങ്ങളുടെ സാമൂഹിക, സാമ്പത്തിക, രാഷ്ട്രീയ, പാരിസ്ഥിതിക ഭൂപ്രകൃതികളിൽ പോലും കാര്യമായ സ്വാധീനം ചെലുത്താനാകും.
അഭയാര്ത്ഥികളെ സംരക്ഷിക്കുന്നതിനുള്ള ചെലവ് പങ്കിടാൻ സമ്പന്ന രാജ്യങ്ങൾ വേണ്ട നടപടികള് സ്വീകരിക്കുന്നില്ല. അഭയാര്ത്ഥി ധനസഹായ പ്രതിസന്ധി പരിഹരിക്കാന് അന്തർദേശീയ സഹകരണത്തെയും ഉത്തരവാദിത്തങ്ങൾ പങ്കുവയ്ക്കുന്നതിനെ അടിസ്ഥാനമാക്കിയുള്ള ഒരു പുതിയ ആഗോള പദ്ധതി ലോകത്തിന് അടിയന്തരമായി ആവശ്യമാണ്. ആളുകൾക്ക് അഭയം നൽകുന്നതിനുള്ള പൊതുജന പിന്തുണ ആഗോളതലത്തിൽ ഉയർന്ന നിലയിലാണെങ്കിലും നിരവധി രാജ്യങ്ങള്ക്ക് അഭയാര്ത്ഥികളെ സ്വീകരിക്കുന്നതില് മുന് വര്ഷങ്ങളെക്കാള് വിമുഖത വര്ധിച്ചിട്ടുണ്ട്. യുകെയിലെ കുടിയേറ്റ പരിഷ്കരണ നിയമം ഇതിനുദാഹരണമാണ്. അഭയാര്ത്ഥികളില് ഏറ്റവും കൂടുതല് സ്ത്രീകളും കുട്ടികളുമാണ്. ലിംഗാധിഷ്ഠിത അക്രമം, കടത്ത്, വിവിധ തരത്തിലുള്ള ചൂഷണങ്ങളും ദുരുപയോഗങ്ങളും ഉൾപ്പെടെയുള്ള ഭീഷണികളെയും ഇവര് അഭിമുഖീകരിക്കുന്നു.
English Summary: World Refugee Day
You may also like this video
