ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) നിർദ്ദേശങ്ങൾ പാലിച്ച്, ബോയിംഗ് 787 ഡ്രീംലൈനർ വിമാനങ്ങളിൽ ഒറ്റത്തവണ സുരക്ഷാ പരിശോധനകൾ പൂർത്തിയാക്കിയതായി എയർ ഇന്ത്യ അറിയിച്ചു. ആദ്യഘട്ടത്തിൽ ഒമ്പത് വിമാനങ്ങളിലാണ് പരിശോധനകൾ നടത്തിയത്. ബാക്കിയുള്ള 24 വിമാനങ്ങളിലും സുരക്ഷാ പരിശോധനകൾ ഉടൻ പൂർത്തിയാക്കുമെന്നും എയർ ഇന്ത്യ വ്യക്തമാക്കി.
ബോയിംഗ് 787 ശ്രേണിയിൽപ്പെട്ട വിമാനങ്ങൾക്ക് സുരക്ഷാ വിലയിരുത്തൽ വേണമെന്ന് വ്യോമയാന മന്ത്രി റാം മോഹൻ നായിഡു നേരത്തെ ആവശ്യപ്പെട്ടിരുന്നു. ഈ വിമാനങ്ങളിൽ അധിക സുരക്ഷാ പരിശോധന നടത്താൻ നിർദേശം നൽകിയതായും അദ്ദേഹം പറഞ്ഞു. വ്യോമ സുരക്ഷയിൽ ഒരു വിട്ടുവീഴ്ചയുമില്ലെന്നും, എയർ ഇന്ത്യയോട് അന്വേഷണത്തോട് പൂർണമായി സഹകരിക്കാൻ ആവശ്യപ്പെട്ടിട്ടുണ്ടെന്നും മന്ത്രി കൂട്ടിച്ചേർത്തു.