ലൈംഗിക ആരോപണത്തിൽ രാഹുൽ മാങ്കൂട്ടത്തിനെതിരായ നടപടിയിൽ എ ഗ്രൂപ്പിൽ അമർഷം പുകയുന്നു. നിയമസഭാ സമ്മേളനത്തിന് മുൻപ് ഗ്രൂപ്പ് യോഗം ചേരണമെന്ന ആവശ്യവുമായി നേതാക്കൾ രംഗത്തെത്തിയതോടെ കോൺഗ്രസിൽ കലാപം ഉറപ്പായി. രാഹുലിനെ പാലക്കാട് മണ്ഡലത്തിൽ സജീവമാക്കാൻ ഷാഫി പറമ്പിൽ എംപിയുടെ നേതൃത്വത്തിൽ എ ഗ്രൂപ്പ് യോഗം ചേർന്നതിന് പിന്നാലെയാണ് പുതിയ നീക്കം.
രാഹുലിനോട് വിശദീകരണം പോലും ചോദിച്ചില്ലെന്നാണ് വിമർശനം എ ഗ്രൂപ്പ് നേതാക്കൾ കെപിസിസി പ്രസിഡന്റ് സണ്ണി ജോസഫിനെയും പ്രതിപക്ഷ നേതാവ് വി ഡി സതീശനെയും അറിയിച്ചതായാണ് സൂചന. രാഹുലിനെതിരെ പെട്ടെന്നുണ്ടായ കടുത്ത നടപടി കുറ്റം ശരിവെക്കുന്നത് പോലെ ആയെന്നുമാണ് എ ഗ്രൂപ്പിന്റെ വിമർശനം. എന്നാൽ രാഹുലിനെതിരെ എടുത്ത കടുത്ത നടപടിയാണ് പാർട്ടിയെ പിടിച്ചു നിർത്തിയതെന്നാണ് സതീശൻ അനുകൂലികളുടെ വാദം.