രാജസ്ഥാനിലെ കോട്ടയിൽ ഒരു വിദ്യാർത്ഥി കൂടി ആത്മഹത്യ ചെയ്തു. ഝാർഖണ്ഡ് സ്വദേശി ശുഭ് ചൗധരിയെയാണ് ഹോസ്റ്റലിലെ മുറിയിൽ മരിച്ച നിലയിൽ കണ്ടെത്തിയത്. കഴിഞ്ഞ രണ്ടുവർഷമായി കോട്ടയിൽ താമസിച്ച് ജെഇഇ പ്രവേശന പരീക്ഷയ്ക്കായി തയ്യാറെടുക്കുകയായിരുന്നു ശുഭ്. കഴിഞ്ഞ ദിവസമാണ് പ്രവേശന പരീക്ഷയുടെ ഫലം വന്നത്. പ്രതീക്ഷിച്ച മാര്‍ക്ക് ശുഭിന് ലഭിച്ചിരുന്നില്ല. ഇതിന്റെ മനോവിഷമത്തിൽ ഹോസ്റ്റലിലേക്ക് മടങ്ങിയ ശുഭ് ആത്മഹത്യ ചെയ്യുകയായിരുന്നു.
പ്രവേശന പരീക്ഷകൾക്കായി വിദ്യാർത്ഥികളെ പരിശീലിപ്പിക്കുന്ന കോച്ചിങ് സെന്ററുകളുടെ കേന്ദ്രമാണ് കോട്ട. കോട്ടയിൽ ഈ വർഷം റിപ്പോർട്ട് ചെയ്യുന്ന നാലാമത്തെ ആത്മഹത്യയാണ് ഇത്. ആത്മഹത്യകൾ വർധിച്ചതോടെ കുട്ടികളുടെ ദിനചര്യയിൽ മാറ്റം വരുത്തി മാനസിക സമ്മർദം കുറയ്ക്കാനുള്ള നടപടികൾക്ക് ഉന്നതതല നിർദേശങ്ങൾ നല്‍കിയിട്ടുണ്ടെങ്കിലും കോട്ടയില്‍ ആത്മഹത്യകള്‍ തുടര്‍കഥയാവുകയാണ്. കഴിഞ്ഞ വര്‍ഷം കോട്ടയില്‍ 26ഓളം വിദ്യാര്‍ത്ഥി ആത്മഹത്യകള്‍ റിപ്പോര്‍ട്ട് ചെയ്തിരുന്നു.
English Summary:Another student suicide in Kota
You may also like this video
