ഡൽഹിയിൽ പൊലീസ് കോൺസ്റ്റബിളിനെ കാറിടിച്ച് കൊലപ്പെടുത്തി. കാറിന്റെ വേഗത കുറയ്ക്കാൻ ആവശ്യപ്പെട്ടതിനെ തുടർന്നാണ് ആക്രമണം. ഡൽഹി നഗ്ലോയിലാണ് സംഭവം. ഡൽഹി നഗ്ലോയിലെ പൊലീസ് കോൺസ്റ്റബിൾ സന്ദീപ് (30) ആണ് കൊല്ലപ്പെട്ടത്.
ഇന്നലെ രാത്രി ബൈക്കിൽ വരികയായിരുന്ന സന്ദീപിനെ കാർ മറികടക്കാൻ ശ്രമിച്ചു. അമിതവേഗത്തിൽ കാർ ഓടിക്കുകയായിരുന്ന ഡ്രൈവറോട് വേഗത കുറയ്ക്കാൻ സന്ദീപ് ആവശ്യപ്പെടുകയും ചെയ്തു. എന്നാല്‍ ഡ്രൈവര്‍ കാറിന്റെ വേഗത കൂട്ടി സന്ദീപിന്റെ ബൈക്കിൽ പിന്നിൽ ഇടിക്കുകയായിരുന്നു. കാറിടിച്ചതിന് ശേഷം 10 മീറ്ററോളം ദൂരം സന്ദീപിനെ റോഡിലൂടെ വലിച്ചിഴച്ചു.
സന്ദീപിനെ ഉടൻ തന്നെ അടുത്തുള്ള ആശുപത്രിയിൽ എത്തിച്ചു. ശേഷം മറ്റൊരു ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. സംഭവത്തിന്റെ സിസിടിവി ദൃശ്യങ്ങൾ പൊലീസിന് ലഭിച്ചു. കാറിലുണ്ടായിരുന്ന രണ്ട് യാത്രക്കാര്‍ സംഭവം നടന്ന ഉടനെ കാർ ഉപേക്ഷിച്ച് രക്ഷപെട്ടതായി പൊലീസ് പറഞ്ഞു.