അവളുടെ വീട്

വീട്
ഇപ്പോഴും
ജാലകം തുറന്നിട്ട് അവളെ
വഴിക്കണ്ണയയ്ക്കുന്നുണ്ടാവും,
വാതിൽ തുറന്ന് വച്ച്
ഇളവെയിൽ വിരിക്കുന്നുണ്ടാവും
മുറ്റം നിറയെ ചരൽ വിരിച്ച്
ഒരു കൊലുസിന്റെ
മണിക്കിലുക്കത്തിന്നായി
കാതോർക്കുന്നുണ്ടാവും,
മുറ്റത്തെ പേരമരത്തിലെ
പാതിപഴുത്ത കായകളിലൊന്ന്
അവൾക്കായി
മാറ്റിവക്കുന്നുണ്ടാവും.
തൊടിയിലെ കുയിലൊച്ചയും
മറുകൂവൽ കൂവിയ പെണ്ണൊച്ചയും,
അണ്ണാറക്കണ്ണന്റെ ചില്ലൊച്ചയും,
നനുത്തു തൂളുന്ന മഴച്ചാറ്റലും
എന്നും തിരക്കുമാത്രം
പൊതിഞ്ഞെടുത്ത്
വന്നു പോവാനിരിക്കുന്നവൾക്കാ-
യെടുത്തു വെക്കുന്നുണ്ടാവും
മുറിയിലെന്നോ
അവളുപേക്ഷിച്ചുപോയ
കടുഞ്ചോപ്പ് മണങ്ങളൊക്കെ
മൺകുടുക്കയിൽ മൂടി വെച്ച്
കാവലിരിക്കുന്നുണ്ടാവും…
എല്ലാ രാത്രികളിലും
ഒരുപിടി ചോറും വറുത്ത കൊണ്ടാട്ടവും
ഉള്ളി മൂപ്പിച്ച ചമ്മന്തിയും ഒഴിയാതെ
കാത്തുവെക്കുന്നുണ്ടാവും
ഒടുവിലൊരു പുഴയായി
അവളിറങ്ങിപ്പോയ വാതിൽ-
പ്പടിമേൽ വന്നു നിന്ന് വിതുമ്പി
നനയുന്നുണ്ടാവും…