ലോകത്തിലെ ഏറ്റവും വലിപ്പം കൂടിയ ശുദ്ധജലമത്സ്യമായ അരാപെെമ, നോർത്ത് അമേരിക്കക്കാരനായ അലിഗേറ്റർ, ബ്ലാക്ക് ഹോസ്റ്റ്, കാറ്റ്ഫിഷ്, അഴകിൽ തിളങ്ങുന്ന അലങ്കാര മത്സ്യങ്ങൾ. . മത്സ്യലോകത്തെ വെെവിധ്യക്കാഴ്ചകളുമായി കോഴിക്കോട് കടപ്പുറത്തെ ഡിടിപിസി അക്വേറിയം സന്ദർശകർക്കായി തുറന്നു നൽകി. വിവിധ അക്വേറിയങ്ങളിലായി 120 തിലധികം അലങ്കാര മത്സ്യങ്ങളെയാണ് സന്ദർശകർക്കായി ഇവിടെ ഒരുക്കിയിരിക്കുന്നത്. കാഴ്ചയിൽ ചിങ്കണ്ണിയെപ്പോലെ തോന്നിക്കുന്ന അലിഗേറ്റർ ഗാർ, റെഡ് ടെയ്ൽ കാറ്റ്ഫിഷ്, അരാപെെമ തുടങ്ങിയവ സന്ദർശകരെ ആകർഷിക്കുന്നു. കടലിനടിയിലൂടെയുള്ള യാത്ര (ടണൽ അക്വേറിയം), വിദേശങ്ങളിൽ മാത്രം കാണപ്പെടുന്ന അപൂർവ്വ വർണ്ണ മത്സ്യങ്ങളുടെ മേളനം, സംഗീതജലധാര തുടങ്ങിയവയും ഒരുക്കിയിട്ടുണ്ട്.
കോഴിക്കോട് ചമ്മച്ചാൽ അക്വേറിയം നടത്തുന്ന കാരപ്പറമ്പ് സ്വദേശിയായ സണ്ണിയാണ് അക്വേറിയത്തിന്റെ നടത്തിപ്പ് ഏറ്റെടുത്തിരിക്കുന്നത്. രാവിലെ 10. 30 മുതൽ രാത്രി 10 മണിവരെയാണ് പ്രവർത്തന സമയം. മുതിർന്നവർക്ക് 30 രൂപയും കുട്ടികൾക്ക് 20 രൂപയുമാണ് ടിക്കറ്റ് നിരക്ക്. ബീച്ചിലെത്തുന്നവരുടെ പ്രധാന ആകർഷണ കേന്ദ്രമായ അക്വേറിയത്തിലേക്ക് പ്രവർത്തനം തുടങ്ങിയ മുതൽ നല്ല തിരക്കാണെന്ന് നടത്തിപ്പുകാരനായ സണ്ണി പറഞ്ഞു. പുതിയ സവിശേഷതകളുമായി അക്വേറിയം തുറക്കുന്ന സമയങ്ങളിലൊക്കെയും ഇവിടുത്തേക്ക് ആളുകളുടെ ഒഴുക്ക് ഉണ്ടാകാറുണ്ടെന്ന് സമീപത്തെ കടക്കാരും പറയുന്നു. ഒപ്പം കച്ചവടവും കൂടുമെന്ന പ്രതീക്ഷയിലാണ് കടക്കാർ.
വിനോദസഞ്ചാരവകുപ്പിന് കീഴിൽ 1995ലാണ് കോർപ്പറേഷന്റെ സ്ഥലത്ത് അക്വേറിയം സ്ഥാപിച്ചത്. പിന്നീട് ടൂറിസം വകുപ്പിന്റെ സാമ്പത്തിക സഹായത്തോടെ ഡി ടി പി സി അക്വേറിയം നവീകരിക്കുകയായിരുന്നു. തീര സംരക്ഷണ നിയമത്തിന് വിരുദ്ധമാകാത്ത വിധമായിരുന്നു നിർമ്മാണം. നക്ഷത്ര മത്സ്യത്തിന്റെ ആകൃതിയിൽ ആരെയും ആകർഷിക്കും വിധത്തിലാണ് കെട്ടിടം. ശേഷമാണ് കടൽ മത്സ്യങ്ങളെയും അക്വേറിയത്തിൽ ഉൾപ്പെടുത്തിയത്. 2022 ഓഗസ്റ്റ് മുതൽ മലബാർ ടൂറിസം ആന്റ് ട്രാവലിംഗ് സൊസെെറ്റിയായിരുന്നു അക്വേറിയം വാടകയ്ക്ക് എടുത്ത് നടത്തിയിരുന്നു എന്നാൽ വാടക കുടിശ്ശിക വരുത്തിയതിനെത്തുടർന്ന് ഡി ടി പി സി ടെണ്ടർ റദ്ദു ചെയ്യുകയും ശേഷം കുറച്ചുനാളുകളായി അക്വേറിയം അടഞ്ഞുകിടക്കുകയായിരുന്നു. ശേഷം പുതിയ ടെണ്ടർ വിളിച്ചാണ് അക്വേറിയം പ്രവർത്തന സജ്ജമാക്കിയത്. അക്വേറിയം നവീകരിച്ച് പുതുമോടിയിൽ പ്രവർത്തനമാരംഭിച്ചതോടെ കൂടുതൽ സന്ദർശകർ ഇവിടേക്കെത്തുമെന്ന പ്രതീക്ഷയിലാണ് ഡിടിപിസി അധികൃതർ.
English Summary; Beach Aquarium at Puthumodi
You may also like this video
