ഡോക്ടറെ ഡ്യൂട്ടിക്കിടെ ആശുപത്രിയിൽ വെച്ച് യുവാവ് കൈയേറ്റം ചെയ്തതായി പരാതി. ആലപ്പുഴ മെഡിക്കൽ കോളേജ് ആശുപത്രിയിലെ അത്യാഹിത വിഭാഗത്തിലെ ഡ്യൂട്ടിക്കിടെ ഹൗസ് സർജൻ ഡോ. അഞ്ജലിക്ക് നേരായാണ് കയ്യേറ്റമുണ്ടായത്. തകഴി ശശി ഭവനിൽ ഷൈജു (39) വിനെ ഇതുമായി ബന്ധപ്പെട്ട് പൊലീസ് അറസ്റ്റ് ചെയ്തു. മദ്യലഹരിയിലായ ഇയാളെ വീട്ടിൽ വീണ് തല പൊട്ടിയതിനെ തുടർന്ന് ഞായറാഴ്ച വൈകിട്ട് 5.30 ഓടെയാണ് ആശുപത്രിയിലെത്തിച്ചത്.
നെറ്റിയിലെ മുറിവിൽ തുന്നിക്കെട്ടിടുന്നതിനിടെ ഇയാൾ അസഭ്യം പറയുകയും ഡോക്ടറുടെ കൈ പിടിച്ച് തിരിക്കുകയുമായിരുന്നു. തുടർന്ന് ആശുപത്രിയിൽ പരിഭ്രാന്തി സൃഷ്ടിച്ച ഇയാളെ ആശുപത്രിയിലെ സുരക്ഷാ ജീവനക്കാർ ഉൾപ്പടെയുള്ളവർ ചേർന്ന് പിടിച്ചു മാറ്റി. ഡോക്ടർ പരാതി അറിയിച്ചതിനെ തുടർന്ന് ആശുപത്രിയിൽ നിന്ന് മുങ്ങിയ ഇയാളെ പിന്നീട് അമ്പലപ്പുഴ പൊലീസ് പിടികൂടുകയും ഷൈജുവിനെതിരെ കേസെടുക്കുകയുമായിരുന്നു. ഇയാളെ പിന്നീട് റിമാൻഡ് ചെയ്തു. വാർക്കപ്പണിക്കാരനായ ഷൈജു ക്രിമിനൽ പശ്ചാത്തലമുള്ള ആളല്ലന്ന് നാട്ടുകാർ പറഞ്ഞു.