ദേശീയ തലസ്ഥാനത്തെ റവന്യൂ ജില്ലകൾ പുനഃസംഘടിപ്പിച്ചുകൊണ്ട് ഡൽഹി സർക്കാർ വിജ്ഞാപനം പുറപ്പെടുവിച്ചു. പുനഃസംഘടനയുടെ ഭാഗമായി പഴയ ഡൽഹി, സെൻട്രൽ നോർത്ത്, ഔട്ടർ നോർത്ത് എന്നീ മൂന്ന് പുതിയ ജില്ലകളാണ് രൂപീകരിച്ചത്. ഇതോടെ ഡൽഹിയിലെ ആകെ ജില്ലകളുടെ എണ്ണം 11ൽ നിന്ന് 13 ആയി ഉയർന്നു. നിലവിലുണ്ടായിരുന്ന ഷാഹ്ദര (Shahdara) ജില്ലയെ മറ്റ് ജില്ലകളിൽ ലയിപ്പിച്ചുകൊണ്ടാണ് പുതിയ ക്രമീകരണം വരുത്തിയിരിക്കുന്നത്. വ്യാഴാഴ്ച പുറത്തിറക്കിയ വിജ്ഞാപനം ഉടനടി പ്രാബല്യത്തിൽ വരുമെന്ന് സർക്കാർ അറിയിച്ചു.
സൗത്ത് ഈസ്റ്റ്, ഓൾഡ് ഡൽഹി, നോർത്ത്, ന്യൂഡൽഹി, സെൻട്രൽ, സെൻട്രൽ നോർത്ത്, സൗത്ത് വെസ്റ്റ്, ഔട്ടർ നോർത്ത്, നോർത്ത് വെസ്റ്റ്, നോർത്ത് ഈസ്റ്റ്, ഈസ്റ്റ്, സൗത്ത്, വെസ്റ്റ് എന്നിവയാണ് ഡൽഹിയിലെ പുതിയ റവന്യൂ ജില്ലകൾ.
ജില്ലകളുടെ മാറ്റം കാരണം പ്രമാണം രജിസ്റ്റർ ചെയ്യുന്നതിനും മറ്റും പൊതുജനങ്ങൾക്ക് ബുദ്ധിമുട്ടുണ്ടാകാതിരിക്കാൻ സബ് രജിസ്ട്രാർ ഓഫീസുകളുടെ പ്രവർത്തനപരിധിയിൽ താൽക്കാലിക ക്രമീകരണങ്ങൾ വരുത്തിയിട്ടുണ്ട്. നിലവിൽ 22 ആയിരുന്ന സബ് രജിസ്ട്രാർ ഓഫീസുകൾ വൈകാതെ 39 ആയി വിപുലീകരിക്കും. ഇതിനായി പ്രത്യേക വിജ്ഞാപനം ഉടൻ പുറപ്പെടുവിക്കുമെന്ന് സർക്കാർ പ്രസ്താവനയിൽ വ്യക്തമാക്കി.