കോട്ടയം ജില്ലയിലെ ഒരു സ്ക്കൂളില് ഒന്പതാംക്ലാസ് വിദ്യാര്ത്ഥിയുടെ നഗ്നചിത്രങ്ങള് സഹപാഠികള് പ്രചരിപ്പിച്ചതായി പരാതി.കുട്ടിയുടെ ക്ലാസില് പഠിക്കുന്ന മറ്റ് വിദ്യാര്ത്ഥികള് ചേര്ന്ന് ഉപദ്രവിച്ച് വിദ്യാര്ത്ഥിയുടെ വസ്ത്രം ഊരിമാറ്റുകയും അത് വീഡിയോ എടുത്ത് പ്രചരിപ്പിക്കുയും ചെയ്തെന്നാണ് പരാതിയില് പറയുന്നത്.
വിദ്യാര്ഥിയുടെ അച്ഛന് പാലാ പൊലീസ് സ്റ്റേഷനില് പരാതി നല്കി.കഴിഞ്ഞ ദിവസമാണ് സംഭവം. വിദ്യാര്ഥിയുടെ വസ്ത്രം ഊരി മാറ്റിയ ശേഷം നഗ്നചിത്രങ്ങള് മൊബൈലില് പകര്ത്തുകയായിരുന്നു. തുടര്ന്ന് വാട്സ്ആപ്പ് വഴി ഇത് മറ്റു കുട്ടികള്ക്ക് ഷെയര് ചെയ്തു. സംഭവത്തിന്റെ ദൃശ്യങ്ങള് ഉള്പ്പെടെ പുറത്തുവന്നതോടെയാണ് വിദ്യാര്ത്ഥിയുടെ അച്ഛന് പൊലീസ് സ്റ്റേഷനില് പരാതി നല്കിയത്.
പരാതിയില് വിശദമായ അന്വേഷണം നടത്തിയ ശേഷം നടപടി എടുക്കുമെന്ന് പൊലീസ് പറഞ്ഞു. വിദ്യാര്ഥിയെ ബലമായി പിടിച്ചുവെച്ചശേഷം വസ്ത്രങ്ങള് ഊരി മാറ്റുകയായിരുന്നു എന്ന് ദൃശ്യങ്ങളില് നിന്ന് വ്യക്തമാണ്. എതിര്ക്കാന് ശ്രമിച്ചെങ്കിലും നിലത്തുവീണ വിദ്യാര്ഥിയെ സഹപാഠികളായ രണ്ടു പേര് ചേര്ന്ന് പിടിച്ചുവെച്ച് ഉപദ്രവിക്കുകയായിരുന്നു എന്നും പരാതിയില് പറയുന്നു. മുന്പും സമാനമായ നിലയില് കുട്ടി അതിക്രമത്തിന് ഇരയായിട്ടുണ്ടെന്നും അച്ഛന് പരാതിയില് പറയുന്നു.