പുന്നപ്ര ‑വയലാർ സ്വാതന്ത്ര്യ സമര സേനാനിയും രാജ്യം താമ്രപത്രം നല്കി ആദരിക്കുകയും ചെയ്ത ഇ വാസുദേവന്റെ പതിമൂന്നാം ചരമദിനം സമുചിതമായി ആചരിച്ചു. ചുങ്കപ്പാലത്തിന് സമീപം അദ്ദേഹത്തിന്റെ സ്മൃതി മണ്ഡപത്തിൽ നടന്ന അനുസ്മരണ സമ്മേളനം കേരളാ സ്റ്റേറ്റ് കർഷക തൊഴിലാളി ഫെഡറേഷൻ (ബി കെ എം യു) ജില്ലാ സെക്രട്ടറി ആർ അനിൽ കുമാർ ഉദ്ഘാടനം ചെയ്തു. കർഷക തൊഴിലാളികളെയും, കന്നിട്ട തൊഴിലാളികളെയും, നിർമ്മാണ തൊഴിലാളികളെയും സംഘടിപ്പിച്ച് തൊഴിലാളി പ്രസ്ഥാനത്തിന് കരുത്ത് പകർന്ന ഇ വാസുദേവന്റെ ജീവിതം ഒരോ കമ്മ്യൂണിസ്റ്റ്കാരനും മാതൃകയാക്കാൻ കഴിയുന്നതാണന്ന് അദേഹം പറഞ്ഞു.
കുര്യൻ ജയിംസ് അദ്ധ്യക്ഷത വഹിച്ച യോഗത്തിൽ സി പി ഐ മുല്ലയ്ക്കൽ ലോക്കൽ കമ്മറ്റി സെക്രട്ടറി എ ആബിദ് സ്വാഗതം പറഞ്ഞു. എ ബിജു, പി ഒ ഹനീഫ്, ആർ വെങ്കിടേഷ്, ആന്റണി ഫിലിപ്പോസ്, ജോസ് കളപ്പുരയ്ക്കൽ, സന്തോഷ്, രാജു എന്നിവർ നേതൃത്വം നല്കി. ഇ വി യുടെ കുടുംബാഗങ്ങളും അനുസ്മരണ സമ്മേളനത്തിൽ പങ്കെടുത്തു.