സംസ്ഥാനത്ത് കടുത്ത ചൂട് തുടരുന്നു. ഉഷ്ണതരംഗ സാധ്യതാ മുന്നറിയിപ്പ് പിന്വലിച്ചെങ്കിലും ഇന്ന് സാധാരണയെക്കാൾ രണ്ട് മുതൽ മൂന്ന് ഡിഗ്രി സെല്ഷ്യസ് വരെ താപനില ഉയരുമെന്നാണ് കേന്ദ്ര കാലാവസ്ഥാ വകുപ്പ് അറിയിച്ചത്. കണ്ണൂർ, കാസര്കോട് ജില്ലകളിൽ 38 ഡിഗ്രി സെല്ഷ്യസ് വരെയും മലപ്പുറം, തൃശൂർ, പാലക്കാട്, കോട്ടയം, കൊല്ലം ജില്ലകളിൽ 37 ഡിഗ്രി സെല്ഷ്യസ് വരെയും കോഴിക്കോട്, എറണാകുളം, പത്തനംതിട്ട, ആലപ്പുഴ ജില്ലകളിൽ 36 ഡിഗ്രി സെല്ഷ്യസ് വരെയും താപനില ഉയരും.
അതേസമയം, നാളെ മുതല് സംസ്ഥാനത്ത് വേനല്മഴ ശക്തമാകുമെന്നും അറിയിപ്പുണ്ട്. നാളെ മുതല് ഞായറാഴ്ച വരെ മഴയുണ്ടാകും. ചില ജില്ലകളില് ശക്തമായ മഴയ്ക്ക് സാധ്യതയുള്ളതിനാല് മഞ്ഞ അലർട്ട് പ്രഖ്യാപിച്ചു. നാളെയും മറ്റന്നാളും തിരുവനന്തപുരം, കൊല്ലം, പത്തനംതിട്ട ജില്ലകളിലും ഞായറാഴ്ച കോഴിക്കോട്, കണ്ണൂർ ജില്ലകളിലുമാണ് മഞ്ഞ അലർട്ടുള്ളത്.
ഇന്നും കടുത്ത ചൂട് തുടരും; നാളെ മുതല് വേനല്മഴയെത്തും
