കൊട്ടാരക്കരയിൽ കിണറ്റിൽ വീണ് മൂന്നുവയസ്സുകാരൻ മരിച്ചു. വിലങ്ങറ സ്വദേശികളായ ബൈജു-ധന്യ ദമ്പതികളുടെ മകൻ ദിലിൻ ആണ് മരിച്ചത്. ഇന്ന് രാവിലെ 10.30ഓടെയാണ് സംഭവം. വീടിൻ്റെ മുറ്റത്ത് കളിച്ചുകൊണ്ടിരിക്കെ, ഉയരം കുറഞ്ഞ ചുറ്റുമതിലുള്ള കിണറ്റിലേക്ക് എത്തിനോക്കുന്നതിനിടെ കുട്ടി കാൽ വഴുതി വീണെന്നാണ് കരുതുന്നത്.
സമീപത്ത് ജോലി ചെയ്തിരുന്ന പെയിന്റിങ് തൊഴിലാളികൾ രക്ഷിക്കാൻ ശ്രമിച്ചെങ്കിലും കിണറിന് ആഴം കൂടുതലായതിനാൽ സാധിച്ചില്ല. തുടർന്ന് വീട്ടുകാർ ഫയർഫോഴ്സിൽ വിവരം അറിയിക്കുകയായിരുന്നു. ഫയർഫോഴ്സ് എത്തി കുട്ടിയെ പുറത്തെടുത്തപ്പോഴേക്കും ജീവൻ നഷ്ടപ്പെട്ടിരുന്നു. മൃതദേഹം കൊട്ടാരക്കര താലൂക്ക് ആശുപത്രിയിലേക്ക് മാറ്റി.