മണിപ്പൂരിലെ കാങ്പോക്പിയിൽ ഇന്ന് രാവിലെ ഉണ്ടായ വെടിവയ്പ്പിൽ മൂന്ന് മരണം. കുക്കി വിഭാഗക്കാരായ മൂന്നു പേരാണ് ഏറ്റുമുട്ടലിൽ കൊല്ലപ്പെട്ടത്. സംഘർഷത്തിൽ നിരവധി പേർക്ക് പരിക്കേറ്റു. മെയ് മൂന്നിന് ആരംഭിച്ച കലാപത്തില്‍ ഇതുവരെ മരണം 200 കടന്നു.
ഇംഫാൽ വെസ്റ്റ്, കാങ്‌പോക്പി ജില്ലകളുടെ അതിർത്തിയിലെ ഇറേങ്, കരം പ്രദേശങ്ങൾക്കിടയിലുള്ള ഗ്രാമവാസികൾക്ക് നേരെയാണ് ആക്രമണമുണ്ടായത്. വാഹനത്തിലെത്തിയ മെയ്തി വിഭാഗക്കാരായ അക്രമികൾ ഗ്രാമവാസികൾക്ക് നേരെ വെടിയുതിര്‍ക്കുകയായിരുന്നു.
തെങ്‌നൗപാൽ ജില്ലയിലെ പല്ലേലിൽ ഉണ്ടായ അക്രമത്തിന് തൊട്ടുപിന്നാലെയാണ് സംഭവം. സംഘർഷത്തിൽ രണ്ട് മെയ്തി വിഭാഗക്കാരടക്കം മൂന്നുപേർ കൊല്ലപ്പെടുകയും 50 ഓളം പേർക്ക് പരുക്കേൽക്കുകയും ചെയ്തിരുന്നു. കാങ്‌പോപ്കി ആസ്ഥാനമായുള്ള കുക്കി സംഘടനയായ ട്രൈബൽ യൂണിറ്റി കമ്മിറ്റി ആക്രമണത്തെ അപലപിച്ചു.
അതേസമയം മണിപ്പൂരിന്റെ അഖണ്ഡത സംരക്ഷിക്കുമെന്ന് പ്രതിജ്ഞയെടുക്കുന്ന പ്രമേയത്തിൽ മെയ്തി വിഭാഗക്കാരായ ഇരുപത്തിമൂന്ന് എംഎൽഎമാർ ഒപ്പുവച്ചു. ബിജെപി കേന്ദ്ര നേതൃത്വവുമായി കൂടിക്കാഴ്ച നടത്താന്‍ ഉടൻ ഡൽഹിയിലേക്ക് പോകുമെന്നും എംഎൽഎമാർ അറിയിച്ചു.
English Summary:Firing in Manipur; Three people belonging to the kuki sect were killed
You may also like this video
