പലസ്തീനെ സ്വതന്ത്ര രാഷ്ട്രമായി അംഗീകരിച്ച് ഫ്രാന്സും. ഫ്രഞ്ച് പ്രസിഡന്റ് ഇമ്മാനുവൽ മാക്രോൺ തിങ്കളാഴ്ച നടന്ന ഐക്യരാഷ്ട്ര സഭയിലാണ് പ്രഖ്യാപനം നടത്തിയത്. സമാധാനവും സുരക്ഷയും കൈകോർത്ത് നിൽക്കുന്ന രണ്ട് രാഷ്ട്രങ്ങളായി ഇസ്രയേലും പലസ്തീനും മാറണമെന്നും മാക്രോൺ പറഞ്ഞു. ന്യൂയോർക്കിൽ ഐക്യരാഷ്ട്രസഭയിൽ സംസാരിച്ച പ്രസിഡന്റ് ഇമ്മാനുവൽ മാക്രോൺ, “സമാധാനത്തിനുള്ള സമയം വന്നിരിക്കുന്നു എന്നും ഗാസയിൽ നടന്നുകൊണ്ടിരിക്കുന്ന യുദ്ധത്തെ ഒന്നും ന്യായീകരിക്കുന്നില്ല” എന്നും പറഞ്ഞു. 150ലേറെ രാജ്യങ്ങളാണ് പലസ്തീൻ രാഷ്ട്രത്തിന് പിന്തുണയുമായെത്തിയത്. ഇസ്രായേലിനെ പ്രകോപിപ്പിച്ച ഒരു നാഴികക്കല്ലായ നടപടി സ്വീകരിക്കാൻ മറ്റ് പാശ്ചാത്യ രാജ്യങ്ങളും പിന്തുണച്ചു. പലസ്തീൻ രാഷ്ട്രത്തെ അംഗീകരിക്കുന്നതിനെതിരെ ഇസ്രായേൽ ഫ്രാൻസിന് ആവർത്തിച്ച് മുന്നറിയിപ്പ് നൽകിയിട്ടുണ്ട്. ഐക്യരാഷ്ട്രസഭയിൽ ചേർന്ന സമ്മേളനത്തിൽ ജർമ്മനിയും ഇറ്റലിയും അമേരിക്കയും പങ്കെടുത്തില്ല. അൻഡോറ, ബെൽജിയം, ലക്സംബർഗ്, മാൾട്ട, മൊണാകോ അടക്കമുള്ള രാജ്യങ്ങളും പലസ്തീനെ അംഗീകരിച്ചു. ബ്രിട്ടണ്, കാനഡ, പേര്ച്ചുഗല്,ഓസ്ട്രേലിയ എന്നീ രാജ്യങ്ങളും കഴിഞ്ഞ ദിവസം പലസ്തീനെ ഔദ്യോഗികമായി അംഗീകരിച്ചു.
ഔദ്യോഗിക കണക്കുകൾ പ്രകാരം, 2023 ഒക്ടോബർ 7‑ന് ഇസ്രായേലിനെതിരെ ഹമാസ് നടത്തിയ ആക്രമണത്തിൽ 1,219 ഇസ്രായേലികൾ കൊല്ലപ്പെട്ടു, അവരിൽ ഭൂരിഭാഗവും സാധാരണക്കാരാണ്. അതിനുശേഷം ഇസ്രായേലി സൈനിക നടപടികളിൽ 65,062 പലസ്തീനികൾ കൊല്ലപ്പെട്ടു.