തായ്ലൻഡും കംബോഡിയയും തമ്മിലുള്ള വെടിനിർത്തൽ കരാറിൽ ഒപ്പിട്ടു. യുഎസ് പ്രസിഡന്റ് ഡൊണാൾഡ് ട്രംപും കരാറിൽ ഒപ്പുവച്ചിട്ടുണ്ട്. മലേഷ്യൻ പ്രധാനമന്ത്രി അൻവർ ഇബ്രാഹിമിന്റെ സാന്നിധ്യത്തിൽ തായ് പ്രധാനമന്ത്രി അനുതിൻ ചാർൺവിരകുൽ, കംബോഡിയൻ പ്രധാനമന്ത്രി ഹുൻ മാനെറ്റ് എന്നിവർക്കൊപ്പമാണ് ട്രംപ് കരാറിൽ ഒപ്പുവെച്ചത്. ഈ വർഷം ഇരു രാജ്യങ്ങൾക്കുമിടയിൽ നടന്ന രക്തരൂക്ഷിതമായ അതിർത്തി തർക്കത്തിന് പിന്നാലെയാണ് ഈ കരാർ. മാനുഷിക പരിഗണനയുടെ അടിസ്ഥാനത്തിൽ 18 കംബോഡിയൻ യുദ്ധത്തടവുകാരെ വിട്ടയക്കുമെന്നും കംബോഡിയയുടെ വിദേശകാര്യ മന്ത്രാലയം അറിയിച്ചു.
നേരത്തെ, ട്രംപിൻ്റെ മധ്യസ്ഥതയിൽ ജൂലൈ അവസാനത്തോടെ ഇരു രാജ്യങ്ങളും ഒരു പ്രാഥമിക വെടിനിർത്തൽ പ്രഖ്യാപിച്ചിരുന്നെങ്കിലും അതിനുശേഷം ഇരുപക്ഷവും കരാർ ലംഘനം ആരോപിച്ച് രംഗത്തെത്തിയിരുന്നു. മലേഷ്യയിലെത്തിയ ട്രംപ് ഈ കരാറിനെ “വലിയ സമാധാന ഉടമ്പടി” എന്ന് വിശേഷിപ്പിക്കുകയും, താൻ അഭിമാനത്തോടെ ഇതിന് മധ്യസ്ഥത വഹിച്ചതായും പ്രസ്താവിച്ചു. കരാർ ഒപ്പിടുന്ന ചടങ്ങിൽ സംസാരിച്ച ട്രംപ്, ഇതിനെ “ചരിത്രപരമായ ചുവടുവെപ്പ്” എന്ന് വിശേഷിപ്പിക്കുകയും അനുതിനെയും ഹുന്നിനെയും അഭിനന്ദിക്കുകയും ചെയ്തു.