വഴിയില്‍ കിടന്ന മദ്യം കുടിച്ച മൂന്ന് യുവാക്കള്‍ ആശുപത്രിയില്‍. ഒരാളുടെ നില ഗുരുതരം. ഇടുക്കി അടിമാലിയിലാണ് സംഭവം. അടിമാലി സ്വദേശികളായ കുഞ്ഞുമോന്‍, മനോജ്, അനില്‍കുമാര്‍ എന്നിവരാണ് ചികിത്സയിലുള്ളത്. കുഞ്ഞുമോന്റെ നിലയാണ് ഗുരുതരമെന്ന് ആശുപത്രി വൃത്തങ്ങളെ അധികരിച്ച് പൊലീസ് പറഞ്ഞു.
ഇന്ന് രാവിലെ ഏഴോടെ മൂന്നുപേരും അടിമാലി അക്കരക്കുന്ന് എന്ന പ്രദേശത്തുകൂടി നടന്നുപോരുമ്പോഴാണ് വഴിയില്‍ നിന്ന് ഒരു കുപ്പി മദ്യം കളഞ്ഞുകിട്ടിയത്. മദ്യക്കുപ്പി തുറന്ന് മൂന്നുപേരും കഴി‍ച്ചു. വൈകാതെ ഓരോരുത്തര്‍ക്കായി ആരോഗ്യപ്രശ്നങ്ങള്‍ അനുഭവപ്പെട്ടു. ഉടനെ അടിമാലി താലൂക്ക് ആശുപത്രിയില്‍ എത്തിച്ചു. എന്നാല്‍ വിദഗ്ധ ചികിത്സയ്ക്കായി ഇവരെ കോട്ടയം മെഡിക്കല്‍ കോളജിലേക്ക് മാറ്റി. കുഞ്ഞുമോന്‍ തീവ്രപരിചരണ വിഭാഗത്തിലാണ്.
അതേസമയം, സംഭവത്തെക്കുറിച്ച് പൊലീസ് വിശദമായ അന്വേഷണം ആരംഭിച്ചു. മൂന്നുപേരില്‍ നിന്നും കൃത്യമായ മൊഴി രേഖപ്പെടുത്താനായിട്ടില്ല. ആരോഗ്യസ്ഥിതിയും മദ്യലഹരിയും മൊഴിയെടുക്കലിനെ ബാധിച്ചിരിക്കുകയാണ്. മനോജും അനില്‍കുമാറും പറഞ്ഞതിന്റെ അടിസ്ഥാനത്തില്‍ പ്രദേശത്ത് പരിശോധന നടത്താനാണ് പൊലീസ് തീരുമാനം. ഒഴിഞ്ഞ മദ്യക്കുപ്പിയോ അതിലെ അവശിഷ്ടമോ കണ്ടെടുക്കാനാവുമോ എന്നാണ് ആദ്യലക്ഷ്യം.
ഇവര്‍ കുടിച്ചിരിക്കുന്നത് വ്യാജമദ്യമാണോ വാറ്റാണോ എന്നും അന്വേഷിക്കും. ഇവര്‍ പറഞ്ഞ പ്രദേശം വാറ്റിന്റെയും വ്യാജമദ്യത്തിന്റെയും നിര്‍മ്മാണം നടക്കാറുള്ള ഇടമാണെന്നാണ് പൊലീസ് പറയുന്നത്.
English Sammury: Three youths who drank alcohol lying on the road are in hospital
