കാനഡയിലെ ഹാമില്ട്ടണില് ഇന്ത്യന് വിദ്യാര്ത്ഥിനി വെടിയേറ്റ് മരിച്ചു. 21 വയസുകാരിയായ ഹര്സിമ്രത് രണ്ധാവയാണ് കൊല്ലപ്പെട്ടത്. ബസ് സ്റ്റോപ്പില് നില്ക്കവെ ഒരു കാറില് സഞ്ചരിച്ചിരുന്ന അജ്ഞാതരില് നിന്ന് വെടിയേക്കുകയായിരുന്നു. പരിക്കേറ്റ പെണ്കുട്ടിയെ ഉടന് തന്നെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
രണ്ട് വാഹനങ്ങളിലുണ്ടായിരുന്ന സംഘങ്ങള് തമ്മിലുള്ള വെടിവയ്പ്പില് ഹര്സിമ്രത് അബദ്ധത്തില് വെടിയേൽക്കുകയായിരുന്നുവെന്നാണ് പൊലീസിന്റെ നിഗമനം. വെടിയുണ്ടയുടെ ദിശമാറി ഹര്സിമ്രതിന്റെ നെഞ്ചില് തറയ്ക്കുകയായിരുന്നു. തൊട്ടുപിന്നാലെ ഇരുവാഹനങ്ങളും സ്ഥലം കാലിയാക്കിയെന്നും ഇവരെ കണ്ടെത്താനുള്ള അന്വേഷണം നടക്കുകയാണെന്നും ഹാമില്ട്ടണ് പൊലീസ് അറിയിച്ചു.