അമേരിക്കയുടെയും ഇസ്രായേലിന്റെയും ആക്രമണം തുടരുന്നതിനിടെ ഇറാനിൽ ഏർപ്പെടുത്തിയ ഇന്റർനെറ്റ് നിരോധനം 48 മണിക്കൂർ പിന്നിട്ടു. ആഗോള ഇന്റർനെറ്റ് നിരീക്ഷകരായ നെറ്റ്ബ്ലോക്സ് ആണ് ഇക്കാര്യം പുറത്തുവിട്ടത്. രാജ്യം പൂർണ്ണമായും ആശയവിനിമയ ബന്ധം വിച്ഛേദിക്കപ്പെട്ട നിലയിലാണ്.
യുദ്ധസമയത്ത് വിവരങ്ങൾ പുറംലോകം അറിയാതിരിക്കാൻ ഇറാൻ ഭരണകൂടം സ്വീകരിക്കുന്ന പതിവ് തന്ത്രമാണിതെന്ന് നെറ്റ്ബ്ലോക്സ് ആരോപിച്ചു. കഴിഞ്ഞ ജനുവരിയിൽ ആഴ്ചകളോളം നീണ്ടുനിന്ന സമാനമായ ഇന്റർനെറ്റ് നിരോധനത്തിനിടെ രാജ്യത്ത് കനത്ത മനുഷ്യാവകാശ ലംഘനങ്ങൾ നടന്നതായും അവർ ചൂണ്ടിക്കാട്ടി. ഇസ്രായേൽ ആക്രമണത്തിൽ സാധാരണക്കാർ കൊല്ലപ്പെടുന്നതും സ്കൂളുകൾക്ക് നേരെയുള്ള മിസൈൽ വർഷവും സംബന്ധിച്ച കൃത്യമായ വിവരങ്ങൾ പുറത്തുവരുന്നത് തടയാനാണ് ഈ നീക്കമെന്നാണ് വിലയിരുത്തൽ.