ഉണ്ണുണ്ണിയുടെ ആഞ്ഞിലി മരം

ചുവട്ടിലെ പുള്ളിവെയിലും
ചിതറിയ പഴവുമേ
അന്നു കണ്ടുള്ളു, ഉണ്ണുണ്ണി
കളിക്കാൻ ഒരപ്പൂപ്പന്റെ
പൂമടിത്തട്ട്
വെയിലിലും മഴയിലും
ഉലഞ്ഞുലഞ്ഞ്
രണ്ടുപേരും കുറേക്കൂടി വലുതായി
ഉണ്ണുണ്ണിയുടെ സൂക്ഷ്മനേത്രങ്ങൾ
ഇപ്പോൾ മരം കാണുന്നു
മരത്തിന്റെ കാതൽ കാണുന്നു
കൃഷ്ണമണിയുടെ എക്സ്റേയിൽ
പല ദിശയിലിരിക്കുന്ന
കട്ടിളക്കാലുകൾ, കതകുകൾ,
ജനൽപ്പാളികൾ
മരണവേദനയമർത്തി
മന്ത്രിപ്പൂ മുത്തശ്ശൻ:
സ്നേഹമെത്രയും മധുരമാം ബലി