കഴിഞ്ഞ 10 വർഷങ്ങൾക്കുള്ളിൽ കേരളം കൈവരിച്ച പുരോഗതിയെ പിന്നോട്ടടിപ്പിക്കുന്ന കേന്ദ്രത്തിന്റെ സാമ്പത്തിക ഉപരോധത്തിനെതിരെ ശക്തമായ സമരത്തിലേക്ക് കേരളം. മുഖ്യമന്ത്രിയുടെ നേതൃത്വത്തില് ഇന്ന് രാവിലെ മുതല് വൈകിട്ട് വരെ പാളയം രക്തസാക്ഷി മണ്ഡപത്തില് സത്യഗ്രഹ സമരം നടക്കും. മന്ത്രിമാരും ജനപ്രതിനിധികളും എല്ഡിഎഫ് നേതാക്കളും ഉള്പ്പെടെ സമരത്തില് പങ്കെടുക്കും. രാവിലെ പത്ത് മുതല് വൈകിട്ട് അഞ്ച് വരെയാണ് സത്യഗ്രഹം. ഐക്യദാര്ഢ്യം അറിയിച്ച് വിവിധ സംഘടനകളുടെ നേതൃത്വത്തില് പ്രകടനങ്ങളും സംഘടിപ്പിക്കും.
കേരളത്തെ പിന്നോട്ടടിപ്പിക്കാനുള്ള കേന്ദ്രത്തിന്റെ സാമ്പത്തിക ഉപരോധം രാഷ്ട്രീയപ്രേരിതമാണെന്ന് മുഖ്യമന്ത്രി പിണറായി വിജയന് പറഞ്ഞു. ജനകീയ വികസന പദ്ധതികൾ നടപ്പിലാക്കുന്ന എൽഡിഎഫ് സർക്കാരിന് കൈവന്ന സ്വീകാര്യതയെ ഇല്ലാതാക്കാനുള്ള നീക്കങ്ങളാണ് നടന്നുവരുന്നത്. നാടിനെ മുന്നോട്ടു നയിക്കാൻ സംസ്ഥാന സർക്കാർ കൊണ്ടുവന്ന സ്ത്രീ സുരക്ഷാ പദ്ധതി, കണക്ട് ടു വർക്ക് സ്കോളർഷിപ്പ് തുടങ്ങിയ ഇടപെടലുകളെയും ക്ഷേമ പെൻഷൻ വിതരണം പോലുള്ള നടപടികളെയും തടസപ്പെടുത്തുന്ന കേന്ദ്ര നീക്കങ്ങളെ കേരളം ചെറുക്കുക തന്നെ ചെയ്യുമെന്ന് മുഖ്യമന്ത്രി വ്യക്തമാക്കി.