മുതിര്ന്ന പത്രപ്രവര്ത്തകനും സമകാലിക മലയാളം വാരികയുടെ എഡിറ്റോറിയല് ഉപദേഷ്ടാവുമായ ടിജെഎസ് ജോര്ജ് അന്തരിച്ചു. വാര്ധക്യ സഹജമായ അസുഖത്തെ തുടര്ന്ന് മണിപ്പാലിലെ ആശുപത്രിയില് വച്ചായിരുന്നു അന്ത്യം. 97 വയസ്സായിരുന്നു.
മജിസ്ട്രേറ്റ് ആയിരുന്ന ടി.ടി ജേക്കബിന്റെയും ചാചിയാമ്മ ജേക്കബിന്റെയും മകനായി 1928 മെയ് ഏഴിനായിരുന്നു തയ്യില് ജേക്കബ് സോണി ജോര്ജ് എന്ന ടി.ജെ. എസ്. ജോര്ജിന്റെ ജനനം. ഇന്ത്യയിലും വിദേശത്തുമായി അരനൂറ്റാണ്ടിലധികം മാധ്യമപ്രവര്ത്തനം നടത്തി. 1950 ല് ബോംബെയിലെ ഫ്രീ പ്രസ്സ് ജേര്ണലില് പത്രപ്രവര്ത്തനജീവിതം ആരംഭിച്ചു. ഇന്റര്നാഷണല് പ്രസ്സ് ഇന്സ്റ്റിറ്റ്യൂട്ട്, ദി സെര്ച്ച്ലൈറ്റ്, ഫാര് ഈസ്റ്റേണ് എക്കണോമിക് റിവ്യൂ എന്നിവയില് മാധ്യമപ്രവര്ത്തകനായി പ്രവര്ത്തിച്ചു. ഹോംങ്കോങില് നിന്നുള്ള ഏഷ്യാവീക്കിന്റെ സ്ഥാപക പത്രാധിപരാണ്.