ഉച്ചത്തില്‍ പാട്ട് വെച്ചുവെന്നാരോപിച്ച് വിവാഹ മണ്ഡപത്തിന് നേരെ ക്രൂഡ് ബോംബെറിഞ്ഞു. ആക്രമണത്തില്‍ നാല് പേര്‍ക്ക് പരിക്കേറ്റു. പശ്ചിമ ബംഗാളിലെ നോർത്ത് 24 പർഗനാസില്‍ ശനിയാഴ്ച രാത്രിയാണ് സംഭവം. വിവാഹ ചടങ്ങുകൾ നടക്കുന്ന കെട്ടിടത്തിന് നേരെയായിരുന്നു ബോംബാക്രമണം. വിവാഹ മണ്ഡപത്തിലെ ഉച്ചഭാഷിണിയുടെ ശബ്ദം ഉയർന്നതിനെതിരെ ഏതാനും പേർ എതിർപ്പ് ഉന്നയിച്ചതിനെ തുടർന്നാണ് സംഘർഷാവസ്ഥയുണ്ടായതെന്ന് നാട്ടുകാർ പറയുന്നു.
സഞ്ജയ് സിങ് (32), മുഹമ്മദ് ആഷിഫ് (24), വാസിം അക്തർ (30), രാജ അൻസാരി (30) എന്നിവർക്കാണ് പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവത്തില്‍ കേസെടുത്ത് അന്വേഷണം ആരംഭിച്ചതായി പൊലീസ് പറഞ്ഞു.
അതിനിടെ, നോർത്ത് 24 പർഗാനയിലെ അംദംഗയിലെ പൂന്തോട്ടത്തിൽ നിന്ന് പ്ലാസ്റ്റിക് ബാഗിൽ നിറച്ച നിലയില്‍ ക്രൂഡ് ബോംബുകൾ കണ്ടെടുത്തു. അടുത്ത വർഷം നടക്കാൻ സാധ്യതയുള്ള പഞ്ചായത്ത് തെരഞ്ഞെടുപ്പിന് മുന്നോടിയായി സംസ്ഥാനത്തുടനീളം പൊലീസ് റെയ്ഡ് നടത്തിവരികയാണ്.
English Summary: miscreants hurl crude bomb at marriage hall
You may also like this video
